• ЭР МОЛИТВА-ВЛАК

• КАС МОЛИТВА-ВЛАК

• ТӰРЛӦ МОЛИТВА-ВЛАК 

ЭР МОЛИТВА-ВЛАК

Мален кынелмекет, моло пашам ышташ тўҥалмет деч ончыч, чылам Ашныше, Чылам Ужшо Юмо ончылан, Юмо деч лўдын, Юмын шинча ончылно шогымо гаяк, Юмым чон дене шонен шогал да тыге ойлен кумал:

Ачан, Эргын, Святой Шўлышын лўмеш. Аминь.

Мытарьын молитваже
Юмо, мыйым, языканым, чамане (Оҥым ыреслен, кумалына).

Тўҥалтыш молитва
Господь Иисус Христос, Юмын Эргыже, Пеш Яндар Шке Аватын, чыла святой-шамычынат кумалмышт верчын мемнам серлаге. Аминь.

Тау Тыланет, мемнан Юмына, тау Тыланет.

Святой Шўлышлан молитва
Пылпомышсо Кугыжа, Чынлан туныктен йывыртыктыше Шўлыш, Тый чыла вере улат, чыла ситарет, керек-могай порылыкат Тый дечет лектеш, илышым Тый пуэт, кӧргышкына толын пурен иле, чыла осал дечат мемнам эрыкте, Поро Юмо, мемнан чоннам утаре¹.

Трисвятой
Святой Юмо², Святой Куатле, Святой Колыдымо, мемнам серлаге (оҥым ыреслен, 3 гана кумалына).

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Эн Святой Троицылан молитва
Эн Святой Троице, мемнам серлаге; Господь Юмо, язык деч мемнам эрыкте; Ашныше Юмо, мемнан осалым ыштымынам кудалте; Святой Юмо, толын, Шке лўмет верчын, черна деч мемнам паремде.

Юмо, серлаге (3 гана).

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Господь Юмылан молитва
Пылпомышто улшо мемнан Ачана! Тыйын лўмет мокталтше, Тыйын Кугыжанышет толжо, Тыйын эрыкет мланде ўмбалнат пылпомышсо гаяк лийже. Мемнан илышаш киндым, тачылыкым, мыланна пу; кудалте мемнан язык-шамычнам, весе-шамычын мыланна ыштыме языкыштым кудалтымына гаяк; языкышке мемнам ит пурто, осал дечын мемнам утаре.

Троичный тропарь-влак
Поро Юмо, мален кынелмекына, ме Тыланет сукен кумалына, Кугу куатан Юмо, ме Тыланет суксо мурым мурена: Святой, Святой, Святой улат Тый, Юмо, Шке Аватын сӧрвалымыж дене мемнам серлаге.

Тау Ачалан, Эргылан, Святой Шўлышлан.

Юмо, Тый мыйым вакшыш гыч, малыме верем гыч кынелтышыч, ынде мыйын ушем ден шўмем яндарым ыште, мыйын умшам поч; вара, Святой Троице, мый Тыланет мурем: Святой, Святой, Святой улат Тый, Юмо, Шке Аватын сӧрвалымыж дене мемнам серлаге.

Кызытат, керек-кунамат, курым-курым мучкак. Аминь.

Вучыдымо годым Юмо судитлаш толеш, керек-кӧнат пашаже койын шогышо лиеш, Туддеч лўдын, пелйўдым кынелын сӧрвалена: Святой, Святой, Святой улат Тый, Юмо, Шке Аватын сӧрвалымыж дене мемнам серлаге.

Юмо, серлаге (12 гана).

Эн Святой Троицылан молитва
Святой Троице, мален кынелмекем, мый Тыланет таум ыштем, Тый шуко порылыкет, шуко чытышет дене мыйын ӧрканымемлан, языкемлан шыч шыдешке, закондымо паша-шамычем верчынат мыйым шыч йомдаре, эре айдемым йӧратен шогыметым веле ончыктен, мыйым, шижде кийышым, Тыйын кучышетым эрдене кумалын мокташ кынелтышыч. Тыйын мутетлан тунемаш, Тыйын кўштыметым умылаш, Тыйын эрыкетым шукташ ынде кызыт мыйын ушем шинча гае поч, мыйын йылмем лывырте; вара мый Тыйын нерген кӧргӧ шўмем дене мурем, Тыйын чыла деч коч Святой лўметым мурен чапландарем: Ачаным, Эргыным, Святой Шўлышыным, кызытат, керек-кунамат, курым-курым мучкак. Аминь.

Толза, мемнан Ашныше Юмылан кумалына (оҥым ыреслен, кумалына).
Толза, мемнан Ашныше Христос Юмылан сукен кумалына (оҥым ыреслен, кумалына).
Толза, мемнан Ашныше Христос Юмылан Шкаланжак сукен кумалына (оҥым ыреслен, кумалына).

50-ше псалом
Юмем, Шкендын кугу кумылет дене мыйым серлаге, шуко порым шонымет дене осалем дечын мыйым эрыкте. Осалем дечын чарныдеак мушкын, языкем дечын мыйым эрыкте; осалым ыштымем мый шинчем, мыйын языкем эре ушыштемак коштеш. Тыйын ончылнет языкым ыштенам. Тыйын шинчат ончылно осал пашам ыштенам, Тыйын каласымет раш, языкем верчын мыйым судитлымет тӧрак. Авам мыйым языкеш иландарен, мый шочмем годымак яндар шочын омыл. Тый чон дене кӧргыштӧ тӧр шонымым йӧратет, пален шуктыдымо Тыйын законетым мыланем умылтарен туныкто. Тый, иссоп выньык дене мыйын ўмбакем шыжыктен, мыйым эрыкте. Мыйым мушкын, лум дечат чот ошым ыште. Куанышашлык, йывыртышашлык шомакым мыланем колыкто; Тый дечет лўдшӧ луэм йывыртыкте; мыйын язык-шамычем Тыйын шинчат ынже ончал, чыла осалым ыштымем дечын мыйым эрыкте. Юмем, мыйын чонем эрыкте, мыйын кӧргешем тӧр уш-акылым угычын ыште. Чурий ончычет мыйым ит кудалте. Мый дечем Святой Шўлышетымат шупшын ит нал. Утаралтшашлыкым, йывыртышашлыкым пу, ашныше Шўлышет дене мыйым пеҥгыдемде. Вийым пуымекет, осалым ыштыше-шамычым Тыйын корнетлан туныктынем ыле, языкан-шамыч Тый декет савырнат ыле; Юмем, вўр йоктарыме орлык дечын мыйым утаре. Утарыше Юмем, мыйын йылмем Тыйын чын оетлан куана. Господь, мыйын умшам почат гын, Тыйын кугу лўметым чапландарем ыле. Мый чоклынем гынат, Тый чоклымым от йӧрате, чоклен йўлалтымымат от йӧрате, чоклымо олмеш чон дене шортын шонышым Юмо йӧрата; чон дене шортын шонышым, толашен нойышым Юмо кудалтен ок кодо. Юмо, Шке порылыкет дене Сион калыклан порым ыште, Иерусалим олан пырдыжшым нєлтал, тунам вара презе-шамычым чоклымо олмеш тӧр шонен улдымым йӧратет.

Ӱшанымашын символжо
1Инанем чыла кучен Ашныше ик Ача Юмылан, пылпомышым, мландым, чыла ужмынам да уждымынам Пўрышылан. 2Юмо дечын шочшо Иктак веле Юмын Эргыже Господь Иисус Христослан, чыла курым дечат ожно улшо Ача Юмо дечын шочшылан. Волгыдо гычын лекше Волгыдо улмыжлан. Чын Юмо дечын шочшо пўрыдымӧ чын Юмо улмыжлан, Ачаж дене иктак улмыжлан, Тудын чыла пўрымыжлан. 3Мемнан верчна, айдеме-шамычым, мемнам, утарышаш верч, Пылпомыш гычын волен, Святой Шўлышын куатше дене Мария лўман Ӱдыр дечын капан айдеме лиймыжлан инанем. 4Понтий Пилат улмо годым мемнан верчна ыресеш пудалалтме орлыкым чытен колымыжлан, тойымылан, 5Юмын законышто каласыме гаяк, кумшо кечын ылыж кынелмыжлан. 6Пылпомышко кўзен каен, Ача Юмын пурла могыреш шичмыжлан инанем. 7Илыше айдеме-шамычым, колышо айдеме-шамычымат судитлаш кугу чап дене вес гана толшашыжлан, Тудын Кугыжанышыже пытышашлык огыллан. 8Адак Святой Шўлышын Илымашым пўрышӧ Юмо улмыжлан, Ача Юмо гычын лекмыжлан. Ача да Эрге Юмо дене иквереш моктен кумалаш кўлмылан. Пророк-шамыч гоч Тудын ойлымыжлан. 9Апостол-шамычын мланде ўмбалне чыла иктеш туныктен кодымо Святой Черкылан. 10Язык гычын эрыкталтшаш верч ик гана веле тынеш пурышашлан инанем. 11Ӱшанен вучем колышо айдеме-шамычын ылыж кынелшашыштым, 12курымеш илышашымат. Аминь.

1-ше молитва — святой Макарий Великийын
Юмо, мыйым языкем дечын эрыкте, мый Тыйын ончылнет нигунамат порым ыштен омыл гынат, осал дечын мыйым утаре. Тыйын эрыкетат мыйын кӧргыштем лийже, мый вара йӧрдымӧ умшам титаклыме деч лўдде почам да Тыйын святой лўметым моктем: Ачаным, Эргыным, Святой Шўлышыным, кызытат, керек-кунамат, курым-курым мучкак. Аминь.

2-шо молитва — тудо святойынак
Утарыше Юмо, мален кынелмекем, мый Тыланет пелйўд мурым мурен кумалам, сукен возын сӧрвалем: мыйын малымем годым языкем дене колаш эрыкым ит пу. Шке эрыкет дене пудалалтше, мыланем Шке шуко порылыкетым пу, мыйым ӧрканен кийыма гыч куштылгын кынелте, Тыйын ончылнет шогымаштат, кумалмаштат мыйым утаре; Христос Юмо, йўд омо деч вара мыланем языкдыме кечым волгалтаре, мыйым утаре.

3-шо молитва — тудо святойынак
Айдемым йӧратыше, Ашныше Юмо, мален кынелмеке, полышым мый Тый дечет йодам, Тыйын поро кумылет дене, Тыйын пашатым ышташ шонен, Тыйым сӧрвалем: чыла жапыштат, чыла пашаштат мыланем полшо, тўнямбалсе тўрлӧ осал дечын мыйым утаре. Иян ондалымыж дечат арале, Шке курымаш Кугыжанышышкет пурто. Тый мыйым Шке пўренат, Тый чыла сайлан Туныктен шогышо да Пуышо улат, мыйын чыла ўшанымашем Тый улат. Тыланет таум ыштем кызытат, керек-кунамат, курым-курым мучкак. Аминь.

4-ше молитва — тудо святойынак
Господь Юмем, Тыйын шуко порылыкет да шуко чаманымет дене кодшо йўд жапым осал толаштарыме деч посна эрташ мыланем пуэнат; Тый Шке, чыла Пўрышӧ, Ашныше Юмо, чын волгыдет дене да яндарештше шўмем дене Тыйын эрыкетым шуктен шогаш полшо, кызытат, керек-кунамат, курым-курым мучкак. Аминь.

5-ше молитва — святой Василий Великийын
Чылам кучен Ашныше Господь, тўрлӧ капанын да куат-влакын Юмыжо, кўшнысӧ илыше да шкеныштым изилан ужшо-влакымат ончышо, шўм-чоным тергыше, айдемын кӧргӧ шонымашыжым ончылгочак палыше, Тўҥалтышдыме да Пытыдыме Волгыдылык, Тудын вашталтышыже уке. Колыдымо Кугыжа, кызытсе жапыште кумалмынам шуко порылыкет дене Шкеак йӧратен нал, шакше умшана дене йодына: паша дене, шомак да шонымаш дене, пален да палыде ыштыме языкнам кудалте; тўрлӧ лавыра деч мемнан чоннам, капнам эрыкте. Эре ямде лийше шўм дене, айык шонымаш дене кызытсе илышын пычкемышыжым эрташ Тыйын Ик шочмо Эргыч, Господь да Юмо, да мемнам Утарыше Иисус Христосын волгыдо да чылалан палыме кокымшо гана толшаш кечыжым вучышо-влаклан пу. Тудо кечын кажныжлан пашаж дене пуаш чылам Судитлыше чапше дене толеш; да языкланыде, йолагайыш кайыде, но эре ямде лийын шоген, Юмын Куанже дене темына да Тудын чап пӧртышкыжӧ пурена. Тушто пайремлыше-влакын чарныдыме йўкышт шокта, да Тыйын чуриетын каласен моштыдымо порылыкшым ончышо-влаклан каласен моштыдымо куан лиеш. Тый вет чын Волгыдо улат, чылам волгалтарыше да святитлыше, да илаш пўрымӧ чыла чонанже Тыйым моктен мура да чапландара курым-курым мучкак. Аминь.

6-шо молитва — тудо святойынак
Тыйым моктена, кўшнысӧ Юмо да поро кумылан Господь, Тый эре мемнан дене кугу да шымлен шуктыдымым, чаплым да чот лўдыктышым шотлен пытарыдыме гана ыштет, шуко паша дене нойышо капланна канашыже йўд омым пуэнат. Тыланет таум ыштена, закондымылыкна верч мемнам пытарен отыл, но, молыгунамсе гаяк айдемым йӧратыметым ончыктен, мемнам, нимом шижде кийышым, Тыйын Кугыжанышетым моктен мураш кынелтенат. Адак Тыйын висен кертдыме порылыкетым сӧрвален йодына: мемнан шонымашнам, шинчанам волгалтаре, ушнам йолагайланен малыма гыч кынелте; мемнан умшанам поч, Тыйым моктымаш дене тудым теме, да калык ончылно ойлена ыле, лўдде мурена ыле Тыланет, чыла дечат моктымо Юмылан: Тўҥалтышдыме Ачалан, Тыйын Ик шочмо Эргычлан, да Иландарыше Эн Святой да Поро Шўлышетлан, кызытат, керек-кунамат, курым-курым мучкак. Аминь.

7-ше молитва — Юмын Эн Святой Аважлан
Моктен мурем Тыйын поро пўрымашетым, Владычице, мыйын ушемым поремдаш сӧрвален йодам. Христосын кўштымыжӧ-влак почеш тӧр ошкылаш мыланем полшо. Шўлыкан омым поктен колтышо мурым эреак мураш пеҥгыдемде. Языкеш варнен пытенам, Шке кумалмет дене, Юмылан ойырен налме Ӱдыр, мыйым утаре. Йўдымат, кечывалымат мыйым арале, ваштареш шогышо тушман деч утаре. Илышым пуышо Юмым Шочыктышо, мыйым, кўлдымаш паша дене пуштмым, ылыжте. Кас огыл Волгыдым шочыктышо, сокыр гае лийше чонем волгалтаре. О, Ашныше Юмын ӧрыктарыше палатыже, мыйым Юмын Шўлышын пӧртшым ыште. Эмлышым Шочыктышо, шуко ий кўлдымаш пашам ыштыме чер деч мыйын чонем паремде. Мыйым, илыш толкын дене лўҥгалтшым, язык касарыме корныш виктаре. Курымашлык тул деч, осал шукш деч, тамык деч мыйым утаре. Йоҥылыш пашам шуко ыштымемлан кӧра осаллан куанашыже мыйым ит пу. Мыйым, языкеш тоштемшым, у айдемым ыште. Эн Языкдыме, мыйым тўрлӧ орлык деч кораҥшым ончыкто да чылам Ашныше Юмым сӧрвале. Пылпомышто чыла святой-влак дене пырля куаным ужаш полшо, Пеш Святой Ӱдыр, нимолан йӧрдымӧ айдеметын йўкшым кол. Мыйын чонем лавыра деч эрыктышашлан, Пеш Яндар, шинчавўд йогыным мыланем пу. Шўм гыч лекше сӧрвалымашым Тыланет чарныдегеч кондем, Ашныше Юмын Аваже, чамане. Мыйын кумалмем йӧратен нал да поро кумылан Юмылан намиен шукто. Суксо-влак дечат Кўшнӧ Улшо, тўня дене ушнымо дечын кўшнырак лияш полшо. Пылпомышсо волгыдым кондышо Леведыш, Юмын порылыкшым мый декем виктаре. Эн Языкдыме, Тыйым мокташ кидем нӧлталам да умшам почам, ўмбакына лавыра пижын пытен. Христосым уло шўм дене сӧрвален, чоным пужышо шапшак деч мыйым утаре; Тудлан чап мурым мурыман да кумалман, кызытат, керек-кунамат, курым-курым мучкак. Аминь.

8-ше молитва — мемнан Иисус Христослан
Шуко чаманыше, Чылам чаманыше мыйын Юмем, Господь Иисус Христос, шуко йӧратымет да чылам утарышаш верч воленат да капан лийынат. Адак, Утарыше, Тыйым сӧрвалем, поро пўрымашет дене мыйым утаре; поро ыштымем верч утарет гын, тиде поро пўрымаш да пӧлек огыл, но шукыжо парым. Эй, шуко порылыкан, каласен моштыдымо чаманыше! Христос Юмем, мыланем ўшаныше еҥ илыше лиеш да курымеш колымашым ок уж, манын каласенат. Тыланет инанымаш ўшаным йомдарышымат утара. Инанем, утаре мыйым, Тый вет мыйым Ыштыше Юмем улат. Инанымем пашам олмеш лийже ыле, мыйын Юмем, вет мыйым чыныш лукшо пашам иктат уке. Тудо инанымем чыла олмеш ситыже ыле, тудо вашештыже ыле, тудо мыйым чыныш лукшо ыле; тудо мыйымат Тыйын курымаш чапетын причастникшым ыштыже ыле. Юмын мутшо деч, куанашыже, мыйым сатана ынже шолышт ыле, Тыйын кидет деч да аралтышет деч ынже кораҥде ыле; но утлынем гынат, уке гынат, мыйым утаре, мыйын Христос Утарышем, вашке ваштарешем лек, вашке пытем. Тый вет авамын кӧргыштыжӧ улмем годсекак мыйын Юмем улат. Кузе ондак языкым йӧратенам, ондалчык сатаналан ыштенам, тугак ынде Тыйым йєраташ да ӧрканыде, кыртмен Тыланет пашам ышташ вийым пу; кажне илыме кечыштем Тыланет, мыйын Иисус Христос Господемлан да Юмемлан, шукырак да шукырак пашам ышташ тўҥалам, кызытат, керек-кунамат, курым-курым мучкак. Аминь.

9-ше молитва — аралыше Суксылан
Мыйын осал чонем воктене да вожылдымын илымаштем шогышо святой Суксо, чытыде илымемлан верчын мыйым кудалтен ит кодо, мый дечем, языкан деч, ойырлен ит кае, колышашлык тиде капем осал иялан кидышкыже виеш налаш эрыкым ит пу; орлыкым чытыше осал кидемат куатаным ыште, утаралтшашлык корнылан мыйым туныкто. Мыйын осал чонем ден капемат левед оролышо Юмын святой Суксыжо, тиде илымаштем кажне кечын тыйым сырыктымем, эртыше тиде йўдым ыштыме языкемат чыла кудалте, проститле, таче кечын мыйым левед, иян чыла тўрлӧ осалышке пуртымыж дечын мыйым арале, нимогай язык денат Юмым сырыкташ ынже лий, Юмо дечын лўдын, Юмылан йӧршын сайын илаш мыланем куатым пуыжо манын, мыйын верчем Юмылан кумал. Аминь.

10-шо молитва — Юмым Шочыктышо Эн Святой Авалан
Юмым Шочыктышо Эн Святой Ава, Шкендын пеш куатан святой кумалмет дене мыйын, ўҥышӧ да осал айдеметын, йӧрдымӧ кӧргем гыч, пычкемышалтше ушем гычат ойгым, мондымым, умылен моштыдымым, ӧрканымым, чыла тўрлӧ шапшак, осал да мыскылтыш шонымым поктыл колто. Вожылмаш пашалан ылыжмем йӧртӧ, вет мый кўчызӧ да шудалме улам. Шуко тўрлӧ да вожылтарыше шарнымаш, осалым ышташ шонымо да тўрлӧ осал паша деч мыйым утаре. Чыла тукым дечат утла Тый эн поро пўрымашан улат, Тыйын чапле лўмет курым-курым мучкак мокталтеш. Аминь.

Святой угодниклан (кӧн лўмжым нумалына) молитва
Юмылан йӧршӧ святой (лўмжӧ), Тый мыланем вашке полшышо, чонем верчынат кумалше улат. Сандене мый Тыйым уло чонем дене йодам: мыйын верчем Юмым сӧрвале.

Эн Святой Юмынавалан муро
Юмым Шочыктышо Ӱдыр, йывырте, Поро Пўрымашан Мария, Тый денет Юмо; чыла ўдырамаш дечат утла Тый поро пўрымашан улат, Тый дечет Шочшат поро пўрымашан, вет мемнан чоннам Утарышым Тый шочыктенат.

Ыреслан тропарь да шочмо мланде верч молитва
Юмо, Шке калыкетым утаре, Шкендын чыла тўрлетланат порым пўрӧ, мыланна, чын верам пагалышылан, сеҥышашлык вийым пу, Ыресетын куатше дене калыкетым арален ашне.

Илыше-влак верч молитва
Юмо, мыйын духовный ачам (лўмжӧ), ача-авам, родо-тукымем, туныктышем, поро ыштыше-влакем (лўмышт) да Юмылан чыла инаныше-влакым утаре да серлаге.

Колышо-влак верч молитва
Господь Юмо, колышо чыла Шке тарзет-влакын чоныштым тынысландаре: ача-аванан (лўмышт), родо-тукымнан (лўмышт), поро ыштыше-влакнан (лўмышт) да чын верам кучышо чыла еҥын эрык дене, эрык деч посна ыштыме тўрлӧ языкыштым кудалтен, Шке Кугыжанышышкет пуртен ашне.

Пытартыш молитва  (Достойно есть...)
Тыйым, мемнан Юмым Шочыктышо Авам, Сулыкдымым, курым-курымак Пиаланым, чынак мокташ кўлеш. Херувим-шамыч дечат утла пагалышашлык лийынат, Серафим-шамыч дечат таҥастарыдыме чапле лийынат, Тыйым, чынак Эрге Юмым языкдеак шочыктышо Авам, кугу улат манын моктена⁴.

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Юмо, серлаге (3 гана).

Господь Иисус Христос, Юмын Эрге, Эн Яндар Тыйын Аватын, преподобный⁵ да Юмым шке кӧргыштышт нумалше ача, да чыла святой-влакын кумалмышт дене мемнам серлаге. Аминь.

КАС МОЛИТВА-ВЛАК

Ачан, Эргын, Святой Шўлышын лўмеш. Аминь.

Господь Иисус Христос, Юмын Эрге, Эн Яндар Тыйын Аватын, преподобный да Юмым шке кӧргыштышт нумалше ача, да чыла святой-влакын кумалмышт дене мемнам серлаге. Аминь.

Тау Тыланет, мемнан Юмына, тау Тыланет.

Святой Шўлышлан молитва
Пылпомышсо Кугыжа, Чынлан туныктен йывыртыктыше Шўлыш, Тый чыла вере улат, чыла ситарет, керек-могай порылыкат Тый дечет лектеш, илышым Тый пуэт, кӧргышкына толын пурен иле, чыла осал дечат мемнам эрыкте, Поро Юмо, мемнан чоннам утаре.

Трисвятой
Святой Юмо, Святой Куатле, Святой Колыдымо, мемнам серлаге (оҥым ыреслен, кум гана кумалына).

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Эн Святой Троицылан молитва
Эн Святой Троице, мемнам серлаге; Господь Юмо, язык деч мемнам эрыкте; Ашныше Юмо, мемнан осалым ыштымынам кудалте; Святой Юмо, толын, Шке лўмет верчын, черна деч мемнам паремде.

Юмо, серлаге (3 гана).

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Господь Юмылан молитва
Пылпомышто улшо мемнан Ачана! Тыйын лўмет мокталтше, Тыйын Кугыжанышет толжо, Тыйын эрыкет мланде ўмбалнат Пылпомышсо гаяк лийже. Мемнан илышаш киндым, тачылыкым, мыланна пу; кудалте мемнан язык-шамычнам, весе-шамычын мыланна ыштыме языкыштым кудалтымына гаяк; языкышке мемнам ит пурто, осал дечын мемнам утаре.

Тропарь-влак
Мемнам серлаге, Юмо, мемнам серлаге; ме, сулыкан-шамыч, шкенам чыныш лукташ ик мутымат пуэн огына керт да мемнам Ашнышым тыге манын сӧрвалена: Юмо, мемнам серлаге.

Тау Ачалан, Эргылан, Святой Шўлышлан.

Юмо, мемнам серлаге, ме Тыланет ўшанен илена, мыланна чот ит шыдешке, закондымылыкнам ушыштет ит кучо, Шке поро шўман улмет дене кызытат мемнам чаманен ончо, тушман-шамыч деч утаре; Тый мемнан Юмына улат, ме Тыйын айдемет-шамыч улына, чыла Тыйын пўрымет-шамыч улына, Тыйын лўметым каласен йодына.

Кызытат, керек-кунамат, курым-курым мучкак. Аминь.

Юмым Шочыктышо поро пўрымашан Ӱдыр, чаманымаш кумылетым мыланна поч, мемнам, Тыланет ўшаныше-шамычым, ит йомдаре, Шке полшен, ойгына гыч утаре. Христослан ўшанен илыше калык-шамычым утарыше Тый улат.

Юмо, серлаге (12 гана).

1-ше молитва – Ача Юмылан, святой Макарий Великийын
Курымаш Юмо да чылам пўрышӧ Кугыжа, тачысе кече марте илаш пуэнат! Кудалте мыйын языкем-шамычым, кудым мый тиде кечын паша дене, шомак дене да шонымаш дене ыштенам. Господь, мыйын ўҥышӧ чонемым кап-кылын да чонын тўрлӧ лавыраж деч эрыкте. Юмо, мыланем толшаш йўдым сайын да ласкан эртараш пу, да, шкемын нужна малыме верем гыч кынелын, шкемым илыме чыла кечыштемат Тыйын Эн Святой Лўметлан йӧршым ыштем да мыйын ўмбакем кержалтше капан да капдыме тушман-влакым сеҥем. Юмо, амыртыше кўлдымӧ шонымаш деч да шала койыш деч мыйым утаре. Тыйын вет Кугыжанышет, куатет, кугу чапет, Ачан, Эргын, Святой Шўлышын, кызытат, керек-кунамат, курым-курым мучкак. Аминь.

2-шо молитва — мемнан Иисус Христос Юмылан, святой Антиохын
Чылам кучен Ашныше Ачан Мутшо, Иисус Христос, Шке чыла ситарыше, Тыйын шуко чаманымет дене нигунамат мый дечем, шке кулет деч, ит кораҥ, но эре мыйын кӧргыштем лий. Иисус, Тыйын шорыкет-влакын поро кўтўчыжӧ, ваштареш шогалше кишкылан мыйым ит пу да сатанан шонымашыжлан мыйым ит кодо, вет мыйын кӧргыштем колымашын пырчыже уло. Господь Юмо, Тыланет кумалына, Святой Кугыжа, Иисус Христос, чарныде йўлышӧ волгыдет дене, Тыйын Святой Шўлышет дене малымем годым мыйым арале. Юмо, мыланемат, Тыйын нимолан йӧрдымӧ кулетлан, мыйын малыме верыштем Шке утарымашетым пу; Тыйын святой Евангелиетым умылымашын волгыдыж дене мыйын ушем волгалтаре, мыйын чонем Тыйын Ыресетым йӧратымаш дене авалте, шўмем Тыйын яндар шомакет дене, мыйын капем Тыйын Шке кумылын, ӧпкелалтде орланымет дене волгалтаре, мыйын шонымашем Тыйын ўҥышет дене арале да мыйым кўлешан жапыште Тыйым чапландараш кынелте. Вет Тый Тўҥалтышдыме Тыйын Ачат дене да Эн Святой Шўлышет дене курымеш кугун чапландарыме улат. Аминь.

3-шо молитва — Эн Святой Шўлышлан
Господь Юмем, Пылпомышсо Кугыжа, Чынлан туныктен йывыртыктыше Шўлыш, Тыйын языкан айдеметым, мыйым, чамане да серлаге, да тиде кечыште айдеме семын, да, эше айдеме семын веле огыл, вольык деч ударак койышым ончыктен, шке эрык дене, эрык деч посна, пален да палыде ыштыме, кудыжым изием годсек да осал туныктымаш верч, кудыжым вожылдымаш да ўшаным йомдарымаш верч ыштыме языкем-шамычым касарен колто. Але Тыйын лўмет дене товатленам, але шке шонымаштем Тудым мыскыленам, але иктаж-кӧлан ӧпкелен каласенам, але иктаж-кєн лўмжым сырымем дене амыртен каласенам, але ойгаҥдаренам, але иктаж-молан сыренам, але ондаленам, але жап деч утым маленам, але мый декем толшо кўчызым ончен омыл, але шке изамым ойгаҥдаренам, але вурседылмашым тарватенам, але иктаж-кӧм вурсенам, титакленам, але шкемым кугуэш ужынам, але кугешненам, але шыдешкенам, але кумал шогымем годым ушем дене тўнясе ондалымаш нерген шоненам; але шакше шонымашем лийын, але утым кочкынам, але утым йўынам, але уш деч посна воштылынам, але осалым шоненам, але еҥын порыжым ужын, шўмышкем кӧранымаш пурен, але кўлдымашым ойленам, але иза-шольо-шамычын языкыштым воштылынам, а вет шкемын языкемже шотлен пытарыдыме, але ӧрканен кумалынам, але моло осал пашам ыштенам, кудыштым монденам, чыла ниным ыштенам, да тиддечат шукырак ыштенам. Чыла Кучышо, мыйым Пўрышӧ Юмем, ўшаным йомдарышым да нимолан йӧрдымӧ Тыйын айдеметым чамане да кодо, да колто, да мыйым серлаге, Тый вет поро да Айдемым йӧратыше улат, да тыныс дене возам, мален колтем да канем, курваланыше, языкан да нимолан йӧрдымӧ, да сукен кумалам, мурем, да Тыйын эн сай лўметым Ача да Тудын Ик Шочмо Эргыж дене пырля чапландарем, кызытат, керек-кунамат, курым-курым мучкак. Аминь.

4-ше молитва — святой Макарий Великийын
Илышлан чыла пуышо Колыдымо Кугыжа, мом Тыланет кондем да мом Тыланет пӧртылтен кертам, кумылын пуышо да Айдемым йӧратыше? Юмо, Тыланет йӧраш тӧчен омыл, ӧрканенам да нимогай порымат ыштен омыл, а Тый, мыйын чонемым утараш манын, тачысе эртен кайыше кече мучашке мыйым кондышыч. Мыйым, языканым да чыла поро паша деч чара улшым, чамане, пытыдыме лавыран пашаш амыргыше, языкыште кийыше чонем нӧлтал, тиде ужмо илышын осал шонымашыжым мый дечем кораҥде. Мыйын языкем проститле, Тый вет Икте Языкдыме улат; тачысе кечын пален, палыде, мут дене, паша дене, чыла шонымаш дене Тыйын ончылнет ыштыме языкем кудалте. Тый Шке мыйым тўрлӧ ваштареш шогымаш деч Тыйын Юмын властет дене, айдемым каласен моштыдымын йӧратымет да куатет дене левед арале. Эрыкте, Юмо, эрыкте мыйын шуко языкем. Порылыкеш шўдӧ, Юмем, осал вапш дечат мыйым кораҥде, мыйын языкым йӧратыше чонем утаре да, Шке Чапет дене толмеке, Шке волгалтше тўсет дене мыйым волгалтаре, титак деч посна мален колташ таче йўд омым пу, осал шонымаш деч, ӧрыктарыше шонкалымаш деч Тыйын айдеметым арале, чыла осалын пашажым мый дечем кораҥде, шўм-кӧргӧ шонымашын шинчажым волгалтаре да мален колтен колаш ит пу. Тыныс Суксетым, чонем ден капемым аралышым да вуйлатышым, мый декем колто, мыйым тушман-влак деч утаре, да, малыме верем гыч кынелмеке, Тыланет тауштен кумалам. Эй, Господь, мыйым, языканым да незерым, Шке кумылет да чон яндарлыкет дене колышт; мален кынелмекем Тыйын мутетлан тунемаш ушым пу да ойгаҥдарыше осал шўлышым мый дечем умбаке поктен колташ Суксо-влаклан шўдӧ; да Тыйын святой лўметым порын моктем да чапландарем, да Юмым Шочыктышо Авам, Эн Яндар Мариям, чапландарем, Кудым мыланна, сулыкан-влаклан, аралтышлан пуэнат, да Тудым, мемнан верч кумалшым, кол; палет вет, Тудо Тыйын айдемым йӧратымет семын ышта да кумалмым ок чарне. Тудын аралымыж дене да Чот Жаплыме Ыресын палыжым пыштыме дене, да Тыйын чыла святой-влакет верч мыйын незер чонем арален кодо, мемнан Иисус Христос Юмына. Тый вет курым-курымеш Святой да моктымо улат. Аминь.

5-ше молитва
Поро да Айдемым йӧратыше мемнан Господь Юмына, тачысе кечын мут дене, паша дене ыштыме языкем проститле. Ласка да тыныс омым мыланем пу. Чыла осал деч аралаш святой Суксетым мыланем колто. Тый вет чонем ден капемым аралыше улат, Тыланет таум ыштена, Ачалан, Эргылан да Святой Шўлышлан, кызытат, керек-кунамат, курым-курым мучкак. Аминь.

6-шо молитва
Мемнан Господь Юмына, ме Тыланет ўшанена. Тыйын лўметым чыла лўм дечат утла кугулан шотлен йодына. Малаш вочмо годым чон ден каплан ласка омым пу, а кўлдымаш шем шонымашым кораҥде. Кап ажгынаш тўҥалмеке, яжар шонымашым чаре. Кап ден чонлан яндар илымашым пу. Поро илыш корныш шогалын, Тыйын поро пўрымашет деч огына ойырло. Тыланет таум ыштена курым-курымеш. Аминь.

7-ше молитва — святой Иоанн Златоустын (24 молитва, кечын да йўдын шагатше улмо семын)
1 Юмо, пылпомышсо Шке порылыкет дечын мыйым ит кодо. 2 Юмо, курымаш орлык дечын мыйым утаре. 3 Юмо, уш дене, шонымаш дене, шомак да паша дене ыштыме языкем кудалте. 4 Юмо, мыйым палыдымаш да мондымаш деч утаре, чон нужналыкым кораҥде, пешкыде кумылем пушкыдемде. 5 Юмо, керек-могай алгаштарымаш дечын мыйым арале. 6 Юмо, осал шонымаш дене пычкемышалтше шўмем волгалтаре. 7 Юмо, мый сулыкан айдеме улам, Тый чаманыше Юмо улат, мыйын вийдыме чонемым ужын, мыйым серлаге. 8 Юмо, мыланем Тыйын святой лўметым моктышашлык поро пашам ышташ вийым пу. 9 Иисус Христос, курымаш илыш книгаш мыйым, Шке кулетым, возо, порын колышашым мыланем пу. 10 Господь Юмем, Тыйын ончылнет ыштыме мыйын ик поро пашамат уке, Тый мыланем поро кумылет дене поро пашам тўҥалаш вийым пу. 11 Юмо, мыйын кумылем Шке поро кумылет дене пушкыдемден святитле. 12 Пылпомышым, мландым Пўрышӧ Юмо, мыйым, сулыканым, вожылтарымым шонышо шакше кулетым, Шке Кугыжанышыштет ит мондо. Аминь.

1 Юмо, языкым касарыктымем колышт. 2 Юмо, мыйым ит кудалте. 3 Юмо, шыгырыш мыйым ит пурто. 4 Юмо, сай шонымашым мыланем пу. 5 Юмо, колышашлыкем ушышкем пурто, шинчавўдым пу да кумылем пушкыдемде. 6 Юмо, сулыкем касараш мыланем шонымашым пу. 7 Юмо, мыйым ўҥышемде, яндар кумыланым, кўштыметым колыштшым ыште. 8 Юмо, мыйым чытышым, сай чонаным, ўҥышым ыште. 9 Юмо, мыйын кӧргышкем чыла порылыкын вожшым, Тый дечет лўдмашым шўмышкем шыҥдаре. 10 Юмо, уло чонем дене, уло ушем дене Тыйым йӧратен, чыла пашам кўштымет семын ышташ вийым пу. 11 Юмо, мыйым осал еҥ-шамыч дечын, ия-шамыч дечын, шакше шонымаш дечын, керек-могай йӧрдымӧ паша дечын арале. 12 Юмо, Тый Шке кузе шинчет, кузе шонет, туге ыштет, мый денемат, языкан дене, Тыйын эрыкет лийже ыле. Тый курым-курым мучко моктымо улат. Аминь.

8-ше молитва — мемнан Иисус Христос Юмылан
Юмын Эрге, Господь Иисус Христос, Эн Яндар Тыйын Ават верч да капдыме Тыйын Суксет-влак, Пророк да Ончыч кайышет да Тыйым Тынеш пуртышо, Юмо дене мутланыше апостол, волгыдо да порын сеҥыше орланыше-влак, преподобный да шке кӧргыштышт Юмым нумалше ача, да чыла святой-влакын кумалмышт дене осалын кызытсе шыгыремдымыж деч мыйым утаре. Мыйым пўрышӧ мыйын Юмем, языкан еҥ ынже коло, но савырнен илыше лийже ыле, манынат. Мыланемат, нимолан йӧрдымылан, шудалмылан, савырнышашым пу; пытарыше кишкын умша гычше мыйым нал, вет тудо мыйым нелаш умшажым почын, илышынек тамыкыш волтынеже. Эй, Юмем, мыйым лыпландарышем, мыйын нимолан йӧрдымӧ улмемлан верч Тый рокыш савырнышаш айдеме кап-кылым налынат, шудалмаш деч мыйым ойыро да йӧрдымӧ чонемлан лыпланымашым пу. Тыйын шўдыметым шуктен шогаш, осал паша деч корааш да Тыйын поро пиалетым налаш шўмышкем пыште. Тыланет, Господь, ўшаненам, мыйым утаре.

9-ше молитва — Юмым Шочыктышо Эн Святой Авалан, Петр Студийскийын
Тыланет, Юмым Шочыктышо Эн Яндар Ава, мый, йӧрдымӧ, сукен возын кумалам; палет Царице, кузе мый пытыдымын языкым ыштем да Тыйын Эргычым, мыйын Юмем, сырыктем. Шуко гана языкем касарыктем гынат, Юмын ончылно ондалышыш лектам, угыч чытырен ӧкынем, тунамак тудо языкымак ыштем, неужели Юмо мыйым пытара? Тидым пален, Владычице, Юмым Шочыктышо мыйын Госпожам, мыйым серлаге, пеҥгыдемде да порым ышташ туныкто, Тыйым сӧрвалем. Палет, Юмым Шочыктышо мыйын Владычицем, осал пашам ыштымем ужмемат ок шу, чыла шонымашем дене Юмын законжым йӧратем; но ом пале, Эн Яндар Госпожа, молан кўлдымым йӧратем, а порыжым ыштынем гынат, ом керт. Эн Яндар, мыйын эрыкемлан шукталташыже ит пу, йӧрдымӧ тудо, но Тыйын Эргычын, мыйын Юмемын, эрыкше лийже ыле; да мыйым утара, ушым, Святой Шўлышын порылыкшым пуа ыле, вара мый, амырчык паша деч кораҥын, Тыйын Эргычын ойжым колыштын, кўштымыжым шуктен илем ыле. Тудлан вет пуыман чыла тўрлӧ чапым, моктымашым, кучышым да Тўҥалтышдыме Тудын Ачажлан, да Эн Святой, поро, Илышым пуышо Тудын Шўлышыжлан, кызытат, керек-кунамат, курым-курым мучкак. Аминь.

10-шо молитва — Юмым Шочыктышо Эн Святой Авалан
Поро пиалан Кугыжан поро пиалан Аваже, Эн Яндар да Порылан пўралтше Мария, Тыйын Эргычын да мемнан Юмынан чаманымыжым мыйын орланыше чонышкем оптал, Тыйын кумалмет дене мыйым поро пашалан кумылаҥден шого, да моло илышаш кече-влакем язык деч посна эртем да Тыйын полшымет дене райым муам, Юмым Шочыктышо Ӱдыр, Икте, Яндар да Порылан пўралтше.

11-ше молитва — аралыше святой Суксылан
Христосын Суксыжо, тый мыйым аралыше святой, мыйын чонем ден капем левед коштшо улат; мыйын таче ыштыме языкем-шамычым чылажымат кудалте, осал тушманын чыла тўрлӧ ондалымаш гычше мыйым утаре, ик языкем денат Юмем сырыктышашем ынже лий ыле. Мый языкан да йӧрдымӧ кулет улам гынат, мыйын верчем сӧрвале; Пеш Святой Троицын, Господь Иисус Христосын Аважын, чыла святой-шамычынат чаманымыштым, порыштым ужаш йӧршым мыйым ыште. Аминь.

Юмым Шочыктышо Авалан

Кондак
Юмым Шочыктышо Ӱдыр, Тылат, чылам сеҥыше Воеводылан, мемнам шыгыр гыч утарыметлан ме, Тыйын йӧрдымӧ кулет-шамыч, таум ыштена да, Тыйым моктен, Сеҥымаш мурым мурена. Тый сеҥыдыме виет дене мемнам керек-могай ойго гычын утаре. Меат Тыланет тыге каласена: о, Поро Яндар Ӱдыр, йывырте.

Христос Юмынан Аваже, Эре Яндар, Пеш Чапле Ӱдыр, кумалмынам Шке Эргычлан, мемнан Юмыланна, намиен шукто, Тыйын верчет мемнан чоннам утарыже ыле.

Чыла ўшанымемат мый Тыланет пыштем, Юмын Аваже, мыйым Шке леведышет йымалне арален ашне.

Юмым шочыктышо Ӱдыр, мыйым, языканым, Тый дечет полышым да Тыйын аралтышетым йодшым, ит шўкал, Тыланет вет мыйын чонем ўшана, мыйым чамане.

Святой Иоанникийын молитваже
Мыйын ўшанымашем Ача, мыйын тынысле аралтышем Эрге, мыйым леведшем Святой Шўлыш, Святой Троице, тау Тыланет.

Тыйым, мемнан Юмым Шочыктышо Авам, Сулыкдымым, курым-курымак пиаланым, чынак мокташ кўлеш. Херувим-шамыч дечат утла пагалышашлык лийынат, Серафим-шамыч дечат таҥастарыдыме чапле лийынат, Тыйым, чынак Эрге Юмым языкдеак шочыктышо Авам, кугу улат манын моктена.

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Юмо, серлаге. (3 гана)

Господь Иисус Христос, Юмын Эрге, Эн Яндар Тыйын Аватын, преподобный да Юмым шке кӧргыштышт нумалше ача, да чыла святой-влакын кумалмышт дене мемнам серлаге. Аминь.

Святой Иоанн Дамаскинын молитваже
Айдемым йӧратыше Кугыжа, малыме верем колымаш верыш савырет мо, але мыйын шудалме чонем волгыдо кечын волгалтарет? Теве колотка кия, колымаш шога. Господь, Тыйын Судет деч да пытыдыме орланымаш деч лўдам гынат, осалым чарныдеак ыштем: Тыйым, мыйын Господь Юмем да Эн Яндар Тыйын Аватым, Пылпомышсо чыла Вийым да мыйым аралыше Суксем эре сырыктарем. Палем, Господь Юмем, Тыйын айдемым йӧратымылыкет ончылно мый йӧрдымӧ улам, чыла тўрлӧ судитлымаш да орланымаш мыйым вуча. Но, Господь, але утаралтнем, але уке — мыйым утаре. Чыным йӧратыше еҥетым утарет гын, нимо кугу уке, яндарым серлагет гын, нимогай ӧрмаш паша уке, вет нуно Тыйын чаманыметлан йӧршӧ улыт. Но мыланем, языканлан, Тыйын порылыкетым ӧрыктарен ончыкто; мыйын осалем Тыйын каласен моштыдымо порылыкет ден чаманымашетым ынже сеҥе ыле; тидын верч Тыйын айдеме йӧратымашетым ончыкто да, кузе шонет, мылам туге утарымашым ыште.

Христос Юмо, мыйын шинчам волгыдемде, колымашлан мален колташ огыл ыле, да тушманем мыйын ўмбак чот кержалтынам манын ынже керт.

Тау Ачалан, Эргылан, Святой Шўлышлан;

Юмо, мыйын чонемын аралышыже лий, мый шуко вапш-сетке коклаште коштам; кораҥде нуным мый дечем да мыйым утаре, Тый вет Айдемым йӧратыше, Поро улат.

Кызытат, керек-кунамат, курым-курым мучкак. Аминь.

Юмын Эн Чапле Аважым, святой Суксо-влак дечат Святойракым, шўм да умша дене чарныде мурена, Тудым Юмым Шочыктышо манына. Вет Тудо чынжымак капым налше Юмым шочыктен да мемнан чонна верч чарныде кумалеш.

Шкендым ыресле, шке ыресетым шупшал, ныл могырыш ыресле да Кугун Пагалыме Ыреслан молитвам луд.

Кугун Пагалыме Ыреслан  молитва
Юмо ылыж кынелже, Тудлан осалым шонышо-шамыч йомын пытышт. Тудым ужын кертдыме-шамыч Тудын чурийже деч куржышт. Шикш шаланыме гае шаланен пытышт; Юмым йӧратыше-влакын чурийышт да шкеныштым ыресын палыж дене ыреслыше-влак ончыч осал-шамыч тул дене шыште левыме гае колен пытышт. Юмым йӧратыше-влак йывыртен каласат: куане, Господьын Эн Чапле да Илышым ыштыше Ыресше, Тыйын пеленет пудалыме, тамыкыш волышо, диаволын куатшым пытарыше мемнан Господь Иисус Христосын куатше дене осалым поктен колто. Тудо вет мыланна Тыйым, Чот Жаплыме Шке Ыресшым, чыла тўрлӧ тушманым поктен колташ пуэн. О, Господьын Кугун Пагалыме, Илышым ыштыше Ыресше, Святой Госпожа — Юмым Шочыктышо Ӱдыр — да чыла святой-влак дене пырля курымеш мылам полшо. Аминь.

Але кўчыкын:
Юмо, Кугун Пагалыме да Илышым пуышо Шке Ыресетын куатше дене мыйым йыр авыре да чыла тўрлӧ осал дечын арале.

Молитва
Юмо, эрык але эрык деч посна, мут але паша дене, шинчен але шинчыде, кечывалым але йўдым, уш але шонымаш дене ыштыме мемнан сулыкнам лушкыдемде, кудалте, касаре: чылажымат касаре мыланна, Тый вет Айдемым йӧратыше поро кумылан Юмо улат.

Молитва
Айдемым йӧратыше Юмо, мемнам ужмошудымо да шыгыремдыше-влакым проститле. Поро ыштыше-шамычлан порым ыште. Иза-шольо да родо-тукымлан утаралтшаш верч йодмыштым да курымаш илышым пу. Вийдыме да черле-влак деке толын лек да тӧрланымашым пу. Теҥызыште улшо-влакымат виктаре. Корныеҥ-влак денат пырля лий. Мыланна служитлыше да мемнам чаманыше-влаклан языкыштым кодышашлыкым пу. Нунын верч кумалаш мемнам, нимолан йӧрдымым, йодшо-влакымат Тыйын кугу чаманымашет дене серлаге. Ондак колышо ача, иза-шольо-влакым, Юмо, шарналте да нуным Шке чурий волгыдет улмо вереш тынысландаре. Пленыште улшо мемнан иза-шольынам, Юмо, шарналте да нуным тўрлӧ авыралтмаш гыч утаре. Тыйын святой черкыштет саскам кондышо да порым ыштыше-влакымат, Юмо, шарналте да нунылан утаралтшаш верч йодмыштым да курымаш илышым пу. Мемнамат, ўҥышым, языканым, Тыйын нимолан йӧрдымӧ кулет-влакым, шарналте да мемнан ушнам Тыйын уш-акылетын волгыдыж дене волгалтаре, да мемнам Шке Эн Яндар Аватын, мемнан Юмым Шочыктышо да эреак Ӱдыр Мариян да чыла святой-шамычетын кумалмышт дене Тыйын кўштыметын корнышкыжо виктаре: Тый вет моктымо улат курым-курым мучкак. Аминь.

Чыла кечылаште языкым почын ойлымаш
Тылат, мыйын Господь Юмем да Пўрышӧ, Святой Троицыште Иктеш улшылан, кумалме да моктымылан, Ачалан, Эргылан да Святой Шўлышлан, чыла мыйын языкем почын ойлем, кудым илыме кажне кечыштем, кажне шагатыште, кызытсе жапыште да эртен кайыше кечыла ден йўдлаште, паша, мут, шонымаш дене, утым кочмо, аракам шуко йўмӧ, шолып кочмо дене, утыждене мутланыме, шўлыкан лийме, ӧрканыме, ваштареш ойлымо, ойколыштдымо улмо дене, еҥым осалыш луктын ойлымо, судитлыме, шот деч посна ыштыме, шкем йӧратыме дене, шуко погым погымо, шолыштмо, чын огылым ойлымо дене, ондален пояш тӧчымӧ, темдымын погым погымаш дене, ушкалыме, кӧраныме, чот сырыме, осалым монден кертдыме, ужмошудымо, закон деч посна налме да чыла мыйын шижмашем дене: ончымо, колмо, ўпшычмӧ, тамлыме, тўкнымым шижме дене да моло тўрлӧ языкым чон да кап дене ыштенам, тидын дене Тыйым, мыйын Юмем да Пўрышем, сырыктенам да лишылем чын огылыш луктынам. Тидлан чаманен, шке титакем шинчен, Тылат, мыйын Юмем, ӧкынен, языкем касараш эрыкем уло: только, мыйын Господь Юмем, полшо мыланем, шортын-шортын шыпак Тыйым сӧрвалем, ончыч ыштыме языкем-шамычым Тыйын чаманымет дене проститле да чыла ниным, кудым Тыйын ончылнет ойлышым, мый дечем ойыро, Тый вет Поро да Айдемым йӧратыше улат.

Малаш вочмо деч ончыч ойло:
Господь Иисус Христос, мыйын Юмем, Тыйын кидышкет шке шўлышем пуэм. Тый мыйым благословитле, Тый мыйым серлаге да курымаш илышым мыланем пу. Аминь.

ТӰРЛӦ МОЛИТВА-ВЛАК

Господь Иисус Христос, Юмын Эрге, мыйым, языканым, серлаге.

Кочкаш шичме деч ончычсо молитва

Господь Юмылан молитва
Пылпомышто улшо мемнан Ачана! Тыйын лўмет мокталтше, Тыйын Кугыжанышет толжо, Тыйын эрыкет мланде ўмбалнат пылпомышсо гаяк лийже. Мемнан илышаш киндым, тачылыкым, мыланна пу; кудалте мемнан язык-шамычнам, весе-шамычын мыланна ыштыме языкыштым кудалтымына гаяк; языкышке мемнам ит пурто, осал дечын мемнам утаре.

Але:
Господь, чыла илыше-шамычын шинчашт Тыйым ўшан дене ончат, кунам кўлеш, Тый нунылан кочкаш пуэт; нунылан кидетым порын шуялтет, порым пуымет дене чыла чонан-шамычым темет.

Кочмо деч вара лудмо молитва
Христос Юмына, мланде ўмбалнысе порылыкет дене мемнам темыметлан Тыланет таум ыштена; пылпомышто улшо Кугыжанышышкет мемнам пуртыде ит кодо, Утарыше, но, кузе тунемшет-влак коклашке толын, нунылан тынысым пуэнат, мемнан декат тол да мемнам утаре.

Тўрлӧ поро пашам тўҥалме деч ончычсо молитва
Господь Иисус Христос, Тыйын Тўҥалтышдыме Ачатын Ик Шочмо Эргыже, Тый яндар умшат дене каласенат: Мый дечем посна нимомат ыштен огыда керт. Господь, мыйын Господем, Тыйын ойлыметлан кӧргӧ шўм-чонем дене ўшанем, Тыланет сукен кумалам: тиде тўҥалме пашам мыланем, сулыканлан, Тыйын полшымет дене виктарен колташ йӧным ыште; Ачан, Эргын, Святой Шўлышын лўмеш. Аминь.

Тўрлӧ поро пашам ыштен пытарыме деч варасе молитва
Мыйын Христос Юмем, чыла тўрлӧ порылыкын тичмашлыкше Тый улат. Мыйын шўм-чонем куанымаш да йывыртымаш дене теме да утаре мыйым. Тый вет Икте, моткоч поро кумылан Господь улат. Тау Тыланет!

Икте-весе коклаште порылыкым шукемдыме верч
Святой Шўлышлан молитва
Пылпомышсо Кугыжа, Чынлан туныктен йывыртыктыше Шўлыш, Тый чыла вере улат, чыла ситарет, керек-могай порылыкат Тый дечет лектеш, илышым Тый пуэт, кӧргышкына толын пурен иле, чыла осал дечат мемнам эрыкте, Поро Юмо, мемнан чоннам утаре.

Але:

Тропарь, 4-ше глас
Шке апостол-влакетым йӧратымаш кыл дене ушышо Христос Юмо, мемнам, Тыйын ўшанле кулет-влакым, Шке декет пеҥгыдын ушен, Шке Шочмо Аватын кумалмыж дене Тыйын сугынетым шукташ да уло шўм-чон дене ваш-ваш йӧраташ полшен шого. Тый вет Икте, Айдемым Йӧратыше Юмо улат!

Кондак, 5-ше глас
Христос Юмо, мемнан шўмнам Тый декет йӧратымаш тул дене авалте, да тудо тул дене уло шўм-чоным ылыжтен, уло шонымаш дене, уло вий дене Тыйым йӧраташ тўҥалына, лишылна-влакымат шкенам йӧратыме семынак йӧраташ тўҥалына, тыгак Тыйын кўштыметым шуктен, Тыланет, мыланна чыла порылыкым Пуышо, таум ыштена.

Тунемме деч ончычсо молитва
Моткоч поро Юмына! Мемнан кӧргӧ вийнам пеҥгыдемдаш пуымо Шкендын Святой Шўлышетын порылыкшым мыланна колто, тунеммашке мемнам шўмаҥде, мемнам ончен куштышо Юмо, погымо шинчымашна Тыйым чапландарыже, ача-аванам лыпландарыже, Черкылан, Шочмо эллан пайдам конден шогыжо.

Тунемме деч варасе молитва
Пўрышӧ Юмо, мыланна тунемаш да шинчымашым налаш порылыкым пуыметлан тау Тыланет. Мемнам вўден наҥгайышым — порылан туныктышо вуйлатыше-влакым, ача-аванам да туныктышо-влакым — благословитле да ончыкыжымат мыланна тунеммашнам шуяш вийым, куатым пу.

Осал тушман деч аралалтме молитва  (90-шо псалом)
Кўшнысӧ Юмын полшымыж дене илыше Пылпомышто улшо Юмын леведышыже йымалне лыплана. Юмылан каласа: полшышем мыйын, аралышем мыйын, Юмо, Тый улат, мый Тыланет ўшанем, манеш. Тудо тыйым кучышо-шамычын оптышышт гычын луктеш, аяр шомак дечат утара. Шулдыржо дене тыйым леведеш, тый Тудын шулдыржо йымалне ўшанен илет. Тудын чынлыкше тыйым сар-курал дене авыра, йўдым лўдыктышӧ дечат, кечывалым лўялтше чоҥештыше пикш дечат, пычкемыште коштшо осал дечат, чер дечат, тура кечывалымсе ия дечат от лўд. Тыйын воктенет тўжем йӧрлеш, пурла могырыштет лу тўжем йӧрлеш, а тый декет огеш лишем. Тый шинчат дене осал-шамычлан орлык лийшашым ужат. Ӱшанымем мыйын, Юмо, Тый улат: кўшнысӧ Юмылан кумал илымеке, тыланет нимогай йӧсат ок лий, тыйын капетлан нимогай сусырат ок тўкнӧ. Юмо тыйын нергенет Суксыжо-шамычлан кўшта: коштмо корныштет тыйым аралыкта, тыйын йолет кў пелен шўртньымаш дечын нуно тыйым шке кидышт дене нӧлтал налыт. Аспид ден василиск кишкым тошкалат, левым да кугу кишкымат лаштыртет. Мыланем ўшанымыжлан верчын Мый тудым утарем, Мыйын лўмем палымыжлан верчын Мый тудым левед аралем. Мыйым сӧрвалымыж годым колыштам, орлыкшо годымат Мый тудын дене лиям. Мый тудым утарен луктам, тудым чапландарем. Мый тудым кужу ўмыраным ыштем, Тудлан Шке утарымашемат ончыктем.

Кугун Пагалыме Ыреслан молитва
Юмо ылыж кынелже, Тудлан осалым шонышо-шамыч йомын пытышт. Тудым ужын кертдыме-шамыч Тудын чурийже деч куржышт. Шикш шаланыме гае шаланен пытышт; Юмым йӧратыше-влакын чурийышт да шкеныштым ыресын палыж дене ыреслыше-влак ончыч осал-шамыч тул дене шыште левыме гае колен пытышт. Юмым йӧратыше-влак йывыртен каласат: куане, Господьын Эн Чапле да Илышым ыштыше Ыресше, Тыйын пеленет пудалыме, тамыкыш волышо, диаволын куатшым пытарыше, мемнан Господь Иисус Христосын куатше дене осалым поктен колто. Тудо вет мыланна Тыйым, Шкенжын Чапле Ыресшым, чыла тўрлӧ тушманым поктен колташ пуэн. О, Господьын Кугун Пагалыме, Илышым Ыштыше Ыресше, Святой Госпожа — Юмым Шочыктышо Ӱдыр да чыла святой-влак дене пырля курымеш мылам полшо. Аминь.

Утарышын Нерукотворный образшылан

Тропарь, 2-шо глас
Тыйын Эн Яндар тўсетлан кумалына, Поро, шке сулыкнам касараш йодына, Христос Юмо: Шке кумылын кап дене ыресыш кўзаш келшенат, да пўрымӧ-шамычетым осаллан пашам ыштыме деч утарет. Сандене, таум ыштен, Тыланет мурена: чылам куан дене теменат, мемнам Утарыше, тўням утараш толшо.

Молитва
О, пеш поро Господь Иисус Христос, мемнан Юмына! Тый ожно Шке эн святой чуриетым вўд дене мушкынат да солык дене ўштынат, да тудо солыкеш чуриетым палемденат, да тудым Эдессысе князь Авгарьлан йӧсыж годым паремаш поро кумылын пуэнат: теве меат кызыт, тыйын сулыкан кулет-влак, чон да кап чер дене сорлыклен кучымо-влак, Тыйын чуриетым, Господь, кычалына да Давид пелен ўҥышӧ чонна дене ўжына. Шке чуриетым мемнан деч ит савыре да Шке кулет-влак деч шыдешкымет годым ит кораҥ; мыланна полшышо лий, мемнам ит шўкал да мемнам ит кодо. О, чыла чаманыше Господь, мемнам Утарыше! Мемнан чоныштына Шкендым Шке ыште, да Святыньыште да чыныште илен, Тыйын эрге-влакет да Тыйын Кугыжанышетын наследникше лийына да тыгак Тыйым, пеш чаманыше мемнан Юмынам, Тыйын Мучашдыме Ачат да Пеш Святой Шўлышет дене иквереш, курымла мучко чарныде моктена. Аминь.

Воздвиженийлан

Тропарь, 1-ше глас
Юмо, Шке калыкетым утаре, Шкендын чыла тўрлетланат порым пўрӧ, мыланна, чын верам пагалышылан, сеҥышашлык вийым пу, Ыресетын куатше дене калыкетым арален ашне.

Молитва
О, Господьын пеш Жаплыме, Кугун Пагалыме да Ылыжтарыше Ыресше, мемнан Христос Юмынан вўржӧ дене святитлыме да тудын колымашыж дене мемнам курымашлык колымаш деч утарыше! Тый мемнан ужмо да уждымо тушман-влакым сеҥымашын палыже улат; тый Христосын Страшный судшо годым кончышаш улат; тыланет ўҥышын кумалам, пагален тўкнем да тыйым йӧратен шупшалам, кызытсе кумалмашем тыйын пеленет Пудалыме деке кондем, да мыйым чонын да капын чыла йӧсыж деч Тый денет улшо Шке вийже дене эмла, чыла ужмо да уждымо тушман деч арала да Шке судыштыжо судитлыдеак пурла могырыш шогалта. Чынжымак Ылыжтарыше святой Ырес, сулыкыштлан кєра колышо еҥ-влак верч колышыжла, Утарыше тыйын пеленет Шке шўлышыжым айдеме семын колтен, вўр ден вўдым йоктарен, да тиде кумыт дене икте, чыла дечынат кўлешан улеш: илыше вўд улшо Ача Юмо, ўдыр вўр дечын капаҥше Эрге Юмо да айдеме шўлышым ылыжтарыше Святой Шўлыш мыланна Юмын чапше лўмеш утаралтмашым ыштен. Нуным кумытым, ик Божество улшым, тынеш пуртымо гоч налме яндар ўшанымаш да Господьын Капше ден Вўржым подылмо гоч налме пеҥгыдын ўшанымаш дене, чоным почын языкым касарымаш дене да чынжымак йӧратымаш дене мыланем тауштен мокташ пу. Кредалмаш да вўр дене темше йогын вўд гай да шўлалтыме годсо пытыше пар гай тиде шинчавўдан илышыште веле огыл, но толшашлык поро пиалан илышыштат кум пачаш порылыкан Ыресын куатше полшымо дене курым-курым мучкак Господьым моктем. Аминь.

Юмым Шочыктышо Эн Святой Авалан молитва-влак
Тыйым огыл гын, кєм сӧрвалем, Владычице, Тый декет огыл гын, кӧн деке шке ойгем дене толам, Кавасе Царице? Тый огыл гын, кӧ мыйын шортмем да сӧрвалымем колеш, Эн Сулыкдымо, христиан-влакын ўшанышт да мемнам, сулыкан-влакым, Аралышына. Тый дечет посна кӧ ойго деч утара? Кол мыйын йӧсланымем да Шке кумылетым мый декем савыре, Владычице, мыйын Юмемын Аваже, да ит кудалте мыйым, Тый дечет полышым йодшым, да ит кодо мыйым, сулыканым. Ушым пу да туныкто мыйым, Кавасе Царице, ит кораҥ мый дечем, Тыйын ӧпкелаш йӧратыше кулет деч, Владычице, лий мыланем Ава да Эҥертыш. Шкемым Тыйын чаманыше леведышетлан ўшанен пуэм. Мыйым, сулыканым, шып да сай илышыш виктарен шого, вара мый шке сулыкем-влак верч шорташ тўҥалам. Мый, титакан, Тый дечет огыл гын, кӧ деч йодшаш улам, сулыкан-влакым Кучышо да Аралыше? Тыйын каласен моштыдымо чаманымашетлан да порылыкетлан инанен, Тыйын кугу лўметлан шке сулыкем нерген каласаш могай шомакым муын кертам?

О, Владычице, Кавасе Царице! Тый мыланем Ава да Ӱшан, Тый мыланем Кучышо да Леведыш, Эҥертыш да Полыш улат! Эн чаманыше мыйын Царицем да эн писе Аралтышем. Шке сӧрвалымет дене мыйын сулыкем левед; ужмо да ужын кертдыме тушманем-влак деч мыйым арале, ваштарешем кынелше шыде еҥ-влакын шўмыштым пушкыдемде! О, Пўрышемын, мыйын Юмемын, Аваже! Тый тўкыдымӧ ўдырлык да лывыжгыдыме яндарлыкын Вожшо улат. О, Юмын Шочмо Аваже! Тый мыланем, капын алгаштарыше сулыкшо ончылно вийдымылан да шўм чер дене йӧсланышылан, полышым пу, Тыйын Эргычын, мемнан Юмынан, аралтышыже да Тыйын эн кугу ӧрыктарыше аралтышет дене чыныш лукмо лиям да Тыйын молитват дене, Юмын Эн Яндар да Эн Сулыкдымо, Эн Моктымо Аваже Мария, тўрлӧ эҥгек да ўмбакем керылтмаш деч утаралтам! Тиде ўшан денак ойлем да сӧрвалем: куане, Чаманыше! Куане, Куаныше! Куане, эн Поро! Тый денет Юмо!

Мыйын Господь Юмемын Пеш Поро Аваже...

3-шо глас
Эн поро мыйын Царицем! Юмым Шочыктышо мыйын Ӱшанем, тулык-влак верч Тургыжланыше да нужна-влакын Аралтышыже, ойган-влакын Куанышт, ӧпкелыше-влакын Леведышышт! Уж мыйын эҥгекем, уж мыйын ойгем, полшо мыланем, вийдымылан, ашне мыйым корныштем. Мыйын ӧпкем палет, шке семынет тудым тӧрлӧ, Тый дечет посна вес полшышем уке, ни вес аралтышем, ни поро лыпландарышем, Тый веле, о, Юмын Аваже, кузе-гынат арале мыйым да переге курым-курымеш. Аминь.

Юмын Аван «Казанский» иконыжо лўмеш

Тропарь 4-ше глас
Кўшнӧ улшо Юмын чаманен утарыктыше Аваже! Шкендын Эргычым, мемнан Христос Юмынам, чылан верчышт сєрвален, Тыйын левед аралымашкет мийыше-шамычлан чылалан утарымашым ыштет. О, Ашныше Юмын Аваже, мемнам, чыланнам, утарыкте! Ойгышто, орлыкышто, шуко язык дене нелемын, черланен, Тыйын моткоч яндар тўсет ончылно, шинчавўд дене ойгырен-шортын, чон дене шонен-юмылтен шогышо-шамычым, чылам, осал дечын утаре, Тыланет чарныдеак ўшаныше-шамычлан порылыкым, куштылгылыкым пу, Юмым Шочыктышо Ӱдыр, чыламат утаре: Тый вет Шкендын еҥет-шамычлан Юмын Леведышыже улат.

Юмын Аван Смоленский  «Одигитрия» иконыжо лўмеш

Тропарь
Юмын Шочмо Аваж деке ме, сулыкан да ўҥышӧ-влак, уло кумылын толына да кумалына, сулыкым кудалташ кӧргӧ чон дене йодына: Владычице, полшо, мемнам чамане, тырше, шуко сулыкым ыштымына верчын ме ынде йомна; мыланна, Шкендын айдемет-шамычлан, порым ыштыде ит кодо; Тыланет веле, Иктылан, ўшанена.

Молитва
О, Юмым Шочыктышо, пеш шерге да чыла еҥ деч кўшнӧ улшо Царице, Пылпомышсо Кугыжан, мемнан Христос Юмынан Аваже, Эн Яндар Одигитрия Мария! Мемнам, сулыкан да нимолан йӧрдымӧ-влакым, тиде шагатыште сукен кумалше да Тыйын эн яндар тўсет ончылно шинчавўд дене чоным почын йодшо-влакым, кол; пытыдыме осал шонымаш деч мемнам кораҥде, Эн Поро Владычице, тўрлӧ орлык да ойго деч мемнам утаре, чыла тўрлӧ кержалтмаш да еҥым осалыш луктын ойлымо деч, да чыташ лийдыме ондалымаш деч утаре.

О, поро пўрымашан мемнан Авана, Шке айдемет-влакым тўрлӧ шыде деч арален кертат вет, да тўрлӧ порым пу да утаре! Мемнан верч, ойгышто да нелыште улшо сулыкан-влак верч, шокшын да уло шўм дене йодын шогышо Тый дечет весе уло мо? Эн Святой Госпожа, Шке Эргычым, мемнан Христос Юмынам сӧрвале, да тек мемнам Пылпомышсо Кугыжанышыш пураш йӧршым ышта; тидлан верч Тыйым, мемнан утаралтмашын Амалжым, эре моктена да курым-курым мучко Ачан, Эргын, Святой Шўлышын Святой да Эн мотор лўмжым, Троицыште моктымо да жаплыме Юмым, кўшкӧ нєлтена. Аминь.

Юмын Аван «Всецарица» иконыжо лўмеш

1-ше молитва
О, Юмым Шочыктышо пеш поро да чудым ыштыше Ава, Пантанасса, Всецарице! Тыйым шке леведыш йымакем пурташат мый йӧрдымӧ улам. Чаманыше Юмын чаманен моштышо да йӧратыше чонан Аваже семын шомакым каласе, да мыйын чонем тӧрлана, да мыйын вийдыме капем пеҥгыдемеш. Сеҥаш лийдыме куатет уло, да Тыйын тўрлӧ мутет шукталтде ок код. О, Всецарице, Тый мыйын верчем йод, Тый мыйын верчем сӧрвале, да Тыйын чапле лўметым эреак, кызытат да мучашдыме курымла гоч чапландарена. Аминь.

2-шо молитва
О, Всецарице, Эн Яндар Юмынава! Афон мланде гыч Российыш кондымо чудотворный иконет ончылно мемнан орланыше чонна гыч лекше сӧрвалымынам кол; Тыйын святой тўсет деке инанен толшо да сукен кумалше, тӧрланен кертдыме чер дене йӧсланыше Шке йочат-влак ўмбаке ончал.

Кузе кайык шулдыржо дене шке игыже-влакым леведеш, тыгак Тыят, эреак Илыше, шуко Эмлыше, Шке омофорет дене мемнам кызыт левед. Тушто, кушто ўшанымаш йомеш, чынжымак Ӱшанымаш лий. Тушто, кушто чыташ лийдыме ойго сеҥынеже, Чытыше да Куштылемдыше лий. Тушто, кушто чоныш ўшаным йомдарыше пычкемыш пурен, тек Юмын каласен моштыдымо волгыдыжо волгалташ тўҥалеш. Вуйым сакыше-влакым лыпландаре, вийдыме-влакым пеҥгыдемде, шыде чонан-влакым пушкыдемде, ушыштым волгалтаре. О, Пеш чаманыше Царице! Черланыше шке айдемет-влакым тєрлате. Мемнам эмлыше-влакын ушыштым да кидыштым благословитле, тек мемнан Христос Утарышынан, Чыла сеҥыше Эмлышын, орудийже лийыт.

О, Владычице! Мемнан дене пырля илыше улмет гаяк Тыйын иконет ончылно кумалына. Орлыкан-влакын Куанышт, ойго годым Лыпландарыше, эмлымаш да паремдымаш дене темше Шке кидетым шуялте, да чудым ыштыше полышым вашке налын, Илыш тўҥалтышым пуышо Шелалтдыме Троицым — Ачам, Эргым да Святой Шўлышым курым-курымеш моктена. Аминь.

Юмын Аван «Державная» иконыжо лўмеш

Тропарь, 4-ше глас
Юмым Шочыктышо Ӱдыр, тыйым пагален, Суксо-влак Тылат служитлат, да чыла Пылпомышсо вий-влак, чарныде мурен, Тыйым моктат. Тыйым, Владычице, уло шўм дене сӧрвалена: волгалтарыше Юмын поро шонымашыже тек кугун пагалыме Тыйын «Державная» иконыштет лиеш. Тек Тыйын Чудотворный иконетын волгалтарыше чапше Тыланет ўшан дене кумалше да Юмылан аллилуиам мурышо-влак ўмбаке вола.

Кондак, 8-ше глас
Чылам сеҥыше Воеводылан сеҥымаш муро-шамычым кондена, вет мыланна Тыйын Державет пуалтын, да нимо дечат она лўд, мемнан утаралтмаш тўня деч огыл, но пеш моктымо Владычицын порыж дене аралалтына да Аралышын Шке мландыжым аралаш толмыжлан кызытат йывыртена.

Кугыжанышым левед аралыме верч молитва
Тўням арален ашныше, чыла тўрлын мурымо Авана! Тыйын кугун пагалыме да чапланыше «Державная» юмоҥат ончылно лўдын, ўшанен, йӧратен, сукен кумалына да уло шўм дене Тыйым сӧрвалена: Тый декет йодын толшо-влак деч Шке чуриетым ит савыре. Волгыдын поро кумылан Аваже, Шке Эргычым да мемнан Юмынам, чоным куандарыше Господь Иисус Христосым, сєрвале: тек мемнан элнам тыныслыкыште арален ашна, тек мемнан кугыжанышын поро кечылажым шукемда да калык-влак кокласе сырымаш деч мемнам кораҥда, тек мемнан святой православный Черкым пеҥгыдемда да тудым ўшаныдымаш, шелалтмаш, йоҥылыш туныктымаш деч чот арала. Пеш Яндар Ӱдыр, тый дечет моло полшышына уке: Тый вет Юмын ончылно Тудын чын шыдыжым пушкыдемдыше да ўшаныше-влаклан пеҥгыде Аралтыш улат. Тыланет инанен кумалше-влакым чылаштымат языкыш пурымо деч, осал еҥ-влакын арам ойлымышт деч, шужымаш, ойго да чер деч утаре. Мыланна ойгырышо шўлышым, шўм ўҥышеммашым, яндар шонымашым, языкан илышым тӧрлатымашым, сулыкнам кудалтымашым пу: да Тыйын чапетым моктен мурен, Пылпомыш Кугыжанышыш пурена ыле да тушто чыла святой-влак дене эн пагалыме да волгыдо, Троицыште моктымо Юмын— Ачан, Эргын да Святой Шўлышын лўмжым чапландарена ыле. Аминь.

Йоча-влак верч молитва

Утарыше Христослан  аван икымше молитваже
Мыйын шўмемын нимо деч шергакан Юмыжо! Тый мыланем йоча-шамычым капаным пуэнат, чонжо дене нуно Тыйын улыт: мыйынымат, йоча-шамычын чоныштымат Тый аклен моштыдымо Шке вўрет дене тўлен налынат; Тыйын Юмо вўрет верч Тыйым сӧрвален йодам, нимо деч шергакан мыйын Утарышем: Шке порылыкет дене мемнан йоча-влакын (лўмышт), креснаэрге-ўдыр-влакын (лўмышт) шўм-чоныштым тарвате, нуным Юмо деч лўдмаш дене арале, осал корныш шогалме деч авырен, поро, чын, волгыдо илыш корныш лук, илышыштым чыла тўрлє поро, утаралтмаш паша дене сӧрастаре, ончыкылыкыштым шонымет семын пўрӧ да чоныштым утаре.

Мемнан ачана-влакын Господь Юмышт! Мемнан йочаланна (лўмышт), креснаэрге-ўдыр-влаклан (лўмышт) Тыйын кўштымет-влакым шукташ, Тыйын каласен кодымет да туныктымет почеш чын илаш кумылаҥше шўмым пу.

Аван кокымшо молитваже
Мланде ўмбалне чыла тўрлылан илышым пуышо, чылалан поро деч порым ыштыше, мыланем ешын аваже лияш пўренат; Тыйын порылыкет мыланем йочам пуэн, садлан мый тыге каласаш тоштам: нуно Тыйын йочат улыт! Тый нунылан илышым пӧлекленат, колыдымо чоным пуэнат, Тыйын кўштымет почеш илаш тынеш пуртенат, эргылыкеш налынат да Шке черкетын илыш кӧргышкыжӧ пуртенат. Ӱмырышт мучко сай илышым пуэн шого, Тыйын Кўштыметын таинствыжым шуктен шогаш йӧршым ыште, Шкендын чынет дене волгалтаре, да Тыйын Святой лўмет нунын кєргыштыштат, нунын гочат волгалт шогыжо! Тыйын лўметым чапландарыше да лишыл-влаклан пайдам кондышо еҥым ончен кушташ шуко порылыкан полышетым колто. Тидым ыштен шукташ мыланем йӧным, чытымашым да вийым пу. Нунын шўмышкышт поро уш-акылын эн тўҥжым — Юмо деч лўдмашым —шыҥдараш туныкто. Сандалыкым виктарен шогышо кугу уш-акылетын волгыдыж дене нуным волгалтаре. Да Тыйым уло чонышт да шонымашышт дене йӧратат да уло шўмышт дене ўмырышт мучко Тыйын мутет-влак деч лўдын илаш тўҥалыт. Чын илышыже — Тыйын кўштыметым шуктен шогымаште, сандене нуным тидлан ўшандараш мыланем ушым пу: вет Юмо полшымо дене уло кумылым пыштен ыштыме паша тиде илышыште чон ласкалыкым да курымашлык илышыште каласен моштыдымо пиалым конда. Тыйын законетым палаш ушыштым волгалтаре! Тек Тыйын чыла вере улметым ўмырышт мучко шижын шогат! Нунын шўмышт гыч тўрлӧ осал койышым кораҥде, закондымылык деке чытыдымашым тарвате, тек илыш-корнышт языкдыме, яндар лиеш, да Тыйын чылалан порым ыштыше Юмо улмет нерген да Тыйын законет да чынет верч пеҥгыдын шогымет нерген эре шарнат. Тыйын поро лўметым пеҥгыде уш-акыл дене пагален эскераш полшен шого. Да шкеныштын койышышт дене Тыйын Черкетын лўмжым огыт шўктӧ да тудын кўштымыж почеш илаш тўҥалыт. Тунеммашын кўлешлыкшылан кумылыштым тарвате, тўрлӧ поро пашам ышташ йӧршым ыште. Тек шке илышыштышт эн кўлешан нерген чын умылымашым пален налыт да калыклан поро пашам ышташ полшышо шинчымаш дене пойдаралтыт. Юмым шинчыдыме йоча-влак дене кылым кучымаш деч кораҥдаш мыланем ушым пу. Куштылгын шонышо, айда-лийже мутланыше еҥ-влакым ынышт колышт да тыгай-влакын языкан койышышт мыйын йоча-влакем Тыйын корнет деч ынышт кораҥде, закондымо-влакын корнышт южгунам сайла коеш гынат, тек нуно огыт алгаштаралт.

Пылпомышсо Ача! Шке койышем дене йоча-влаклан кўлдымашым ончыкташ огыл манын, чыла шотыштат шкем сайын кучаш мыланем вийым пу: йоча-влакын койышыштым эреак эскерен, тўрлӧ кўлдымаш шонымаш да кугешнымаш кумыл деч кораҥде, языкыштым касаре, тореш шогымо койышыштым, айда-йӧра шонымыштым чаре, тек нуно шўм йодмышт почеш огыт ыште, тек Тыйымат, Тыйын законетымат огыт мондо. Закондымо пашашт ушыштым да тазалыкыштым тек ок лунчырто, языкышт чон да кап-кыл куатыштым ок иземде.

Чыным эскерен шогышо Судья, ача-аван языкше верч йоча-влакым кумшо да нылымше тукым марте наказатлаш Тыйын куатет уло; мыйын йоча-влак деч тыгай наказанийым кораҥде, мыйын языкем верч нуным кугу нелылыкыш ит пурто, но Шке порылыкет дене лупс леведме семын нуным левед, тек суапле пашашт дене порылык деке лишем шогат да Тыйын поро шонымашет дене яндар чонан еҥ-влакын йӧратымашеш кушкын толыт.

Чаманымылыкын да тўрлӧ порылыкын Ачаже! Ача-ава-влакын шижмашышт дене мый шкемын икшывем-влаклан мланде ўмбалнысе тўрлӧ поянлыкым, Пылпомышсо лупсын порылыкшым, ўян мландын лектышыжым тыланынем ыле, но чылалан Тыйын святой эрыкет лийже! Нунын илыш корныштым Тыйын поро шонымашет дене виктаре, тачысылык киндышт деч посна ит кодо, курымаш пиалан илышым палаш шке жапыштыже мо кўлешым колтен шого; Тыйын ончылнет языкым ыштат гынат, нунылан поро лий; самырык годсо, палыде ыштыме осал пашаштлан языканыш ит лук, Тыйын порылыкет ваштареш шогалме годым шўм-чоныштым ойгыраш тарате; пеҥгыдын судитле да еҥым чаманыше лий, Тыланет келшыше корныш шогалте, Шке чуриет дечын ит кораҥде! Нунын шонымашыштым куанен нал, тўрлӧ поро пашаштышт сеҥымашым пу, ойган кечышт годым нунын дечын ит кораҥ, сеҥен кертдыме нелылыкыш ит кондо.

Чыла тўрлӧ порылыкан Юмо! Йоча-влакым Шке порылыкет дене левед, Тыйын Суксет полшымо дене нуным тўрлӧ эҥгек да осал корно гыч кораҥде. Мыйым шке шочшем верч куаныше авам ыште, мыйын илышыштем куаным кондышт да шоҥгылыкемлан эҥертыш лийышт. Тыйын порылыкетлан ўшанен, нунын дене пырля Шучко судет ончыко шогалаш да лўдде каласаш пу: «Теве мый да мыйын йочам, кудым Тый мыланем пуэнат, Юмо!» Да поро кумыл дене Тыйын каласен моштыдымо порылыкетым да курымаш йӧратымашетым моктен мурен, Тыйын эн святой лўметым чапландарем: Ачаным, Эргыным, Святой Шўлышыным, курым-курым мучкак. Аминь.

Утарышылан кумшо молитва
Господь Иисус Христос, Юмын Эргыже, Тыйын Эн Яндар Аватын кумалмыж дене мыйым, сулыканым, да Тыйын йӧрдымӧ кулетым (лўм), колышт.

Господь, Тыйын чаманен вуйлатымет дене да Шке лўмет дене мыйын йочамым (лўм) чамане да утаре.

Господь, Тыйын ончылнет пален да палыде ыштыме тудын сулыкшо-влакым проститле.

Господь, Тыйын туныктымо тӧр корныш тудым шогалте да ушым пу, шўм-чонжым утараш да капшым паремдаш Шке Христос волгыдет дене волгалтаре.

Господь, мӧҥгыштыжӧ, пӧртшӧ воктене, пасушто, пашаште да корнышто да Тыйын ужмаште чыла вере тудым благословитле.

Господь, тудым чоҥештылше пуля, пикш, кўзӧ, керде, яд, тул, вўд налмаш, колымашым кондышо шўйшӧ лўмӧ, атомын пўсӧ йолжо да вучыдымо колымаш деч Шке святой леведышет йымалне арале.

Господь, ужмо да уждымо деч, тўрлӧ эҥгек, шыде да ойго деч тудым утаре.

Господь, тўрлӧ чер деч тудым паремде, тўрлӧ йырнык деч эрыкте да шўм-чон йӧсыжым да ойгыжым куштылемде.

Господь, Святой Шўлышетын порыжым кужу илыме курымжылан да тазалыкшылан шкенжым яндарын кучаш ситышынак пу.

Господь, Тый тудлан уш-акыл пўсылыкым да кап-кыл чулымлыкым пуэнат. Чыла тидым шукемде да пеҥгыдемде.

Господь, эрыкет лиеш гын, Шке благословениетым Юмылан йӧршӧ поро еш илышым чоҥаш да поро йоча-влакым вожылмашыш пурыде ышташ пу.

Господь, мыланем (лўм), Тыйын йӧрдымӧ да сулыкан кулетлан, ача-ава благословенийым эрдене, кечывалым, кастене да йўдым Шке лўмет верч мыйын йочам да Тыйын кулетлан пу, вет Тыйын Кугыжанышет курымаш, чыла сеҥыше да чыла кертше. Аминь.

Юмым Шочыктышо Авалан молитва
О, Эн Святой Владычице, Юмым Шочыктышо Ӱдыр, Шке леведышет йымалне мыйын йоча-влакем (лўмышт), чыла ўдыр-эргым да азам, тынеш пуртымо-влакым, да эше лўмым пуэн шуктыдымо да аван мўшкырыштє улшо-влакым, утаре да арале. Шке авалык вургемет дене нуным левед, Юмо деч лўдшӧ да ача-авам колыштшо лийышт, мыйын Господь Юмемым да Шке Эргычым сӧрвале, нунылан утаралташ мо кўлешым пуыжо. Тыйын Ава аралтышетлан нуным пуэм, вет Тый Шке кулет-влаклан Юмын Леведышыже улат. Аминь.

Аралыше Суксылан молитва
Аралыше святой Суксо, мыйын йоча-влакем (лўм-влак) осал иян пикшыже-влак деч, ондалышын шинчаж деч Шке леведышет дене левед, нунын шўмыштым суксын яндарлыкыштыже арале.

Тунеммаште нелылыкым чытыше йоча-влак верч молитва
Господь Иисус Христос, мемнан Юмына, чыла латкок апостолын шўмышкышт чынжымак пурышо да тулан йылме семын волышо Эн Святой Шўлышын поро вийже дене нунын йылмыштым почынат, тыге нуно тўрлӧ йылме дене мутланаш тўҥалыныт! Господь Иисус Христос, мемнан Юмына, Тыйын Святой Шўлышетым нине йоча ўмбаке (лўмышт) Шке колто да нунын шўмыш Святой Возымашын шўлышыжым пурто, кудым Тыйын Эн Яндар Кидет закон пуышо Моисейын оҥашыже возен. Кызытат, керек-кунамат, курым-курым мучкак. Аминь.

Йоча-влак йоммо годым Георгий Победоносецлан

Тропарь, 4-ше глас
Пленыште улшо-влакым утарыше, кўчызӧ-влакым арален шогышо, черле-влакым тӧрлатыше, Сеҥымашым кондышо великомученик Георгий, мемнан чоннам утараш Христос Юмым сӧрвале.

Молитва
Святой, чапланыше, Христос верч пеш чот орландарыме да чылан моктымо Георгий! Мемнан шонымашна верч палыме йодшо, тыйын черкыштет погынышо да тыйын святой иконет ончылно кумалше еҥ-влак, тыйым сӧрвалена: Шуко порылыкан Юмылан мемнан пеленна да мемнан верч кумал, да тудын порылыкшым йодшо-влакым, мемнан утаралтшашым да илышыште кўлешым йодшо-влакым, ок кодо да мемнам чаманен колеш. Сеҥымашым кондышо святой, адакат тыйым сукен сӧрвалена, тыланет пуымо порылык дене православный сарзе-влакым пеҥгыдемде да ваштареш шогышо тушман-влакын вийыштым шалате, тек нуно намыслалтыт да вожылтаралтыт, да нунын осалышт шалана, да мыланна Юмын полшен шогымыжым палат; ойгышто да экшыкыште улшылан чылалан Тыйын пеш виян аралтышетым ончыкто. Чыла чонаным да чондымым Ыштыше Господь Юмым сӧрвале, тек курымашлык орланымаш деч мемнам утара, да эре Ачам, Эргым да Святой Шўлышым чапландарена да тыйын мемнан верч шогыметым ойлен палдарена, кызытат, керек-кунамат, курым-курым мучкак. Аминь.

Святой-влаклан молитва

Мирликийский архиепископ Святитель Николай Чудотворецлан  (9/22 майысе пайремже лўмеш)

Тропарь, 4-ше глас
Волгыдо кугу куан лийме кече дене Бар ола йывырта, да тидлан верч уло тўня духовный муро-влакым мура: таче священный кугу куан кече, Святитель да Чудым ыштыше Николайын кугун пагалыме да шуко паремдыше капшым вес верыш кусарымаш. Мемнан верч шогышо Великий Николай, кузе шичдыме кече волгыдым колтымо йоллаж дене волгалтеш, ўшанен сӧрвалыше-влак деч пычкемыш алгаштарымашым да ойгым тугак поктен колто да утаре мемнам.

Кондак, 3-шо глас
Святитель Николай, эрвел гыч касвел марте тыйын капет шўдыр гае кўзен, тыйын кайымет дене теҥыз святитлалтын, да Бар ола тый денет поро пўрымашым налеш: пеш сылне, ӧрыктарыше да чаманыше Чудотворец, мемнан деке толынат.

1-ше молитва
О, пеш Святой Николай, Юмылан чот йӧршӧ, мемнан шокшо аралтышна да чыла ойгышто вашке полшышына! Мылам, сулыканлан да тиде илышыште шўлыканлан, полшо, мыйын чыла сулыкем, кудым самырыкем годым, уло курымем мучко паша дене, шомак дене, уш дене да чыла шижмашем дене ыштенам, мыйым проститлаш Господь Юмым сӧрвале да мыланем, эн сулыканлан, чонем лекме годым полшо; Господь Юмым, чыла чонаным Ыштышым, мыйым южысо мытарстве да курымаш йӧсланымаш деч утараш сӧрвале да эреак Ачам, Эргым да Святой Шўлышым, да тыйын чаманыше аралтышетым моктем, кызытат, керек-кунамат, курым-курым мучкак. Аминь.

2-шо молитва
О, пеш чаманыше мемнан святой Николай ачана! Тыйын чаманен утарыметлан ўшанен кумалше да алал кумылын чыла сєрвалыше-шамычлан тый кўтўчӧ гае арален ашнен туныктышо улат; вашке тарванен, Христослан инаныше-шамычым нуным пытарыше пире деч арале; илыме чыла элыштымат калык пудыраныме да мланде чытырналтме деч, тушманын пызырен толмо да шке коклаштышт кредалме деч, шужымаш, кугу вўд да тул деч, керде да кенета колымо деч шке святой кумалмет дене арален ашне. Казаматыште шинчыше кум еҥым чаманен, нуным кугыжан шыдыж дене руалыктен пуштмо деч утарымет гаяк, мемнамат тугак чамане; ме уш, шомак да паша дене, пычкемышыште илыме гае, языкеш варнен пытенна, Юмын шыдыж деч, курым мучко орландарыме деч мемнам утаре. Вара тыйын кумал полшымет дене, Шкенжын чаманыше кумылжо дене, поро куатше дене Христос Юмо тиде ўмырыштӧ мыланна ласка да языкдыме илышым пуа, шола могыреш шогалме деч утара, святой-шамыч дене пырля пурла могыреш шогалаш йӧршым ышта. Аминь.

Преподобный Серафим Саровскийлан

Тропарь, 4-ше глас
Поро пиалан, изиет годсекак Христосым йӧратенат. Тудлан, Иктылан, тул гай служитлаш шоненат, чарныде кумалмет да пашат дене еҥ уке верыште чот тыршенат, пушкыдо шўмет дене Христосын йӧратымашыжым погенат. Юмын Аважын ойырен йӧратымыже лийынат, сандене тыйым чотак йодына: мемнан преподобный Серафим ачана, шке кумалмет дене мемнам утаре.

Молитва
О, Юмылан кугун йӧршӧ, преподобный да шке кӧргыштет Юмым нумалше мемнан Серафим ачана! Пылпомышсо моктымаш вер гыч мемнан ўмбакына, ўҥышӧ да вийдыме, шуко сулык дене пызырналтше, тыйын полышетым да ласкаҥдарымашым йодшо-влак ўмбаке ончал. Шке поро чонет дене мемнан ўмбакына тўслен ончал да Юмын кўштымыжым мыланна пеҥгыдын аралаш, православный верам чоткыдын кучаш, мемнан язык касарымашнам Юмылан тыршен кондаш, Юмын корнышто порын тыршен шогаш да Юмо ончылно мемнан верч тыйын сӧрвален йодмашетлан йӧршӧ лияш полшо. Эй, Юмын святойжо, мемнам, тыланет ўшанен да йӧратен кумалше-влакым, колышт да мемнам, тыйын аралтышетым йодшо-влакым, ужын кертдыме ит лий: кызытат да мемнан колымына годымат мыланна полшо да шке молитват-влак дене диаволын пижедылмыж деч мемнам арале, тек тиде вий мемнам ок кучо, но тыйын полшымет дене райысе поро илышым налаш йӧршӧ лийына. Тыланет ме чот ўшанена, поро чонан ачана: чынак мыланна утаралташ корным ончыктышо лий да Пеш Святой Троицын Престолжо ончылно тыйын Юмылан йӧрен йодмет дене пычкемышалтдыме курымаш илыш волгыдыш мемнам кондо, Ачан, Эргын да Святой Шўлышын эреак кумалаш йӧршӧ лўмыштым чыла святой-влак дене пырля курым-курым мучкак чапландарена да моктен мурена. Аминь.

Святой страстотерпец Николай кугыжалан молитва
О, орланымашым чытыше святой Николай кугыжа, Господь тыйым, Шке помазанникшым, шке еҥет-влакым порын да чын судитлаш да православный кугыжанышын аралтышыже лияш ойырен.

Тиде кугыжаныш службым да еҥ-влакын чонышт верч тыршымашым Юмо деч лўдмаш дене шуктенат. Шокшо коҥгаште шєртньым шуарыме гай тыйым терген, шуко орлыкым чытыше Иовлан пуымо гаяк, Господь тыланет кочо ойгым чыташ пўрен, а мучашлан кугыжан престол деч кораҥмашым да орланен колымашым тыланет колтен. Христосын чын кулжо семын, чыла тидым ўҥышын чытен лектынат. Кызыт святой мученик-влак: святой пелашет Александра, кугыжан шочшет — святой-влак: Алексий, Ольга, Татиана, Мария, Анастасия да тыйын ўшанле слугат-влак дене пырля Чыла Кучышо Кугыжан престолжо ончылно кўшыл чапыште куанен илет.

Христос Кугыжа верч кугун орланыметлан кєра нунын дене пырля Тудым лўдде сӧрвале, тек Господь Юмын помазанникшым да кугыжам пушташ пуышо калыкын сулыкшым касара. Тек Господь орланыше Российым Юмо ваштареш кучедалше-влак деч утара, вет нуным Юмо мемнан сулыкна да Юмо деч кораҥ илымыланна кӧра пуэн. Да, эрыкше уло гын, православный кугыжа-влакын престолыштым пӧртылта, а мыланна сулык касарымашым пуа да сай пашам ышташ кумылаҥда. Тек тыйын семынетак ўҥышылыкым, мутым колыштмашым, йӧратымашым налына да Пылпомыш Кугыжанышыш пураш йӧршӧ лийына, да тый денет да чыла святой у мученик ден Российысе исповедник-влак дене пырля Ачам, Эргым да Святой Шўлышым чапландарена, кызытат, керек-кунамат да курым-курым мучкак. Аминь.

Великомученик Пантелеимонлан

Тропарь, 3-шо глас
Орланымашым чытыше да черым паремдыше Пантелеимон, поро Юмым сӧрвале, мемнан чонлан сулыкнам касарымашым пуыжо.

Молитва
О, Христослан пеш кугун йӧршӧ, индырымашым чытыше да пеш чаманыше эмлызе Пантелеимон! Чамане мыйым, сулыкан кулым, мыйын сӧрвалымем да ом керт манмем кол, мемнан каплан да чонлан Пылпомышсо, кўшнысӧ Врачым, мемнан Христос Юмынам, поремде, да мыйым йӧсландарыше чер деч мыланем тек пареммашым пуа. Айдеме-влак кокласе эн сулыкан деч йӧрдымӧ кумалмем нал. Мый декем поро пўрымашет дене тол. Мыйын сулыкан лўмӧ-влакем деч ит йырне, шке порылыкетын елейже дене нуным шўрӧ да мыйым паремде; вара, капем да чонем дене таза лийын, кодшо кечылаштем Юмын порылыкшо дене языкым касарен да Юмылан йӧршын илем ыле, да мыйын илышем поро мучашан лиеш ыле. Чынжымак, Юмылан йӧршӧ! Христос Юмым сӧрвале, да тыйын сӧрвалымет дене мыйын капемлан ласкалыкым да мыйын чонемлан утаралтмашым пуа. Аминь.

Петербургысо блаженная Ксениялан молитва
О, чыла тўрлӧ поро пиалан Ксения авана! Кўшнысӧ Юмын шулдыр йымалныже илыше, Юмын Аважын вуйлатымыж дене тӧр корно дене пеҥгыдын коштыктымо, шужымашым, йўмӧ шумашым, йўштым, шокшым, вурсымашым, поктымашым шуко чытыше, ончыкылыкым ужаш, ӧрыктарыше паша-влакым ышташ Юмо дечын куатым налынат да Тудын леведыш йымалныже канет: ынде Святой Черке, тамлын ўпшышӧ пеледышла, тыйым чапландара; тыйын шўгар ўмбалнет, святой тўсет ончылно, илышылан кумалме гае кумалына: мемнан йодмынам налын, Пылпомышто улшо чаманыше Ачанан престолышкыжо намиен шукто, тыланет еҥ-шамыч верч кумалаш вий пуалтын, да тый декет толшылан курымаш илышым, поро пашам тўҥалаш благословенийым, чыла ойго ден колянымаш деч кораҥшашым йод: тыйын святой кумалмет дене чыла чаманыше Утарыше ончылно мемнан верч, йӧрдымӧ да языкан еҥет-влак верч, шого; поро пўрымашан святой Ксения авана, аза-влакым тынеш пуртен волгалтараш да Святой Шўлышын пуымо печатьше дене палемдаш, ўдыр-рвезе-влакым чын верч пеҥгыдын шогаш, Юмылан инанаш, Туддеч лўдаш туныкташ, тунеммаштышт сеҥымашке шуаш полшо; сусыр, тўрлӧ чер дене орланыше-шамычым паремде, ешанлан йӧратымашым, икте-весе коклашке умылымашым колто, монах-влаклан койдымо тушман ваштареш пеҥгыдын шогаш полшо, мыскылымаш деч нуным арале, священник-влакым Святой Шўлыш дене пеҥгыдемде, калыкнан да элнан тыныс, ласка илышыжым арален шого, колаш шушо-влаклан Святой Причастийым подыл колаш Юмым сӧрвале, тый вет мемнан ўшанна, писын колын утарышына улат, тыланет таум ыштена да тый денет пырля Ачам, Эргым да Святой Шўлышым моктена, кызытат, керек-кунамат, курым-курым мучкак. Аминь.

Москвасе блаженная Матроналан молитва
О, поро пиалан Матроно авана, чонет дене Юмын престолжо ончылно Пылпомышто шогет, капетше дене мландыште канет да тыланет кўшычын пуымо порылык дене тўрлӧ ӧрыктарыше пашам ыштет. Ончал кызыт поро шинчат дене сулыкан, ойган, черле да кечына-влакым языкан алгаштарымаште илен эртарыше-влак ўмбаке, лыпландаре мемнам, ўшаным йомдарыше-влакым, кӧргӧ чоннам эрыкташ языкна верч Юмын колтымо пеш неле чер-влакнам паремде, утаре мемнам тўрлӧ ойго да осал паша деч, сӧрвале мемнан Господьнам, Иисус Христосым, мемнан закондымо пашанам, сулыкнам, самырык годсо гыч тачысе кече да шагат йотке ыштыме языкнам кудалташ йод, да тыйын сӧрвалымет дене поро вийым да чон куаным налын, Троицыште улшо Ик Юмым: Ачам, Эргым да Святой Шўлышым — моктен мурена, кызытат, керек-кунамат, курым-курым мучкак. Аминь.

Преподобный Матфейлан, Яраҥысе чудотворецлан, молитва
О, мемнан преподобный Матфей ачана, Яраҥысе чудотворец. Изиет годсекак уло чонет дене Христосым йӧратенат, чонетше шуко палыше да кугу уш-акыл шўлыш, Господьлан пеҥгыдын ўшаныме шўлыш, тыматле койыш-шоктыш да Тудым кугун пагалымаш дене темын, шке виетым да поро кумылетым тиде пашалан тўрыснек пуэнат, ўҥышӧ шўмет дене Господьын чыла кўштымыжым шуктен шогенат. Суксо семын илен, пўтым кученат, молитвам лудынат, чон порылыкын кўкшытышкыжӧ шуынат, шуко порылыкан Юмо деч чон поянлыкын тўрлӧ пӧлекшым налынат. Ончылгоч ужын моштымашым, чон да кап паремдымашым мланде ўмбалне илымет годымак шуко ончыктенат. Шуко еҥлан тый поро туныктышо да лыпландарыше, поро кўтўчӧ да Юмым сӧрвалыше лийынат. Ойган кечылаште, Юмылан ўшаныше-влакым чот поктылмо, тӧрсыр да пуламыр жапыште чонышт утаралтшаш корныштым йўд пычкемышыште чолга шўдыр гае волгалтаренат, священник-влакым Юмым ойлен палдарыме да орланыме корнышто пеҥгыдемденат, монах-влакым Христосын шўдымыжым шуктымо корныш виктаренат, черкыш толшо-влакым лыпландаренат, ойым пуэнат. Шкеже поктылмашым, орлыкым чытенат, черле лийынат, кызыт Пылпомыш Кугыжанышыште шогет. Коленат гынат, чонет дене мемнан коклаштына улат да тый декет йӧратен да ўшанен йодын толшо-влаклан поро полышым пуэт. 

Преподобный Матфей ачана, тыйым уло чон дене сєрвален йодына: Вятский мландын чудотворецше да Юмын престолжо ончылно улшо преподобный Трифон, блаженный Прокопий да моло святой-влак дене пырля мемнан Христос Юмынам, Утарышынам, сӧрвале, Тудын деч элыштына Юмылан ўшанымашым пеҥгыдемдаш, священник-влаклан тыршен юмылташ, монах-влаклан подвигыштышт сеҥымашыш шуаш, чыла христиан-влаклан Юмым йӧратен, порын илаш йод. Туныкто мемнам уло чон да шўм дене мемнан Господьнан Иисус Христосын эн сылне, чапле лўмжым йӧраташ да чапландараш, тый вет шкежат Тудын лўмжым чарныде моктенат да шўмыштет нумалынат. Да меат моктен мурена шке илышна дене Ачам, Эргым да Святой Шўлышым, кызытат, керек-кунамат, курым-курым мучкак. Аминь.

Марий мландысе священномученик Адриан ден Михаил пресвитер-влаклан

Тропарь, 8-ше глас
Христосын утарыше ўдымашыжын мотор саскаже семын, у мученик-влак, Кугыжалан да Юмылан порын йӧршӧ жертве лийында, ўшанымашлан туныктышо да Юмын Порылыкшым шарыше Адриан, ўҥышӧ да шыдешкыдыме образ Михаил священник-влак: тидлан верч ожнысо страстотерпец-влакын гай чап венецым Подвигым ышташ кумылаҥдыше деч налыда. Тудлан, Шуко Порылыканлан, мемнан чоннам утарышаш верч кумалза, сӧрвалена.

Кондак, 2-шо глас
Толза, чын ўшаныше-влак, ушан волгалтарыше-влакым моктена, Адриан ден Михаил священномученик-влакым кугу йўк дене моктен мурена. Вет нуно уш пычкемышалтме да Юмо деч кораҥ илыме жапыште, вўрым йӧсланен йоктарен, Марий мландым мушкыныт да тыге тиде яндар вургем дене сӧрастаралтыныт, да мемнан верч Айдемым Йӧратыше Ик Юмым сєрвален, кызытат Святой Троице ончылно шогат.

Марий мландысе священномученик епископ Леонидлан

Тропарь, 4-ше глас
Царевококшайскын поро архипастырьже лийынат, священномученик Леонид, Христос Черкын пеҥгыдемдышыже да Евангелийым шуктышо: орландарен поктылмашыш, тыгак кепшылыш да пычкемыш петырымашыш логалынат, апостол-влак семын шке илышетым тӧрленат, вўр марте орланенат, Христос Юмо нерген чыным туныктенат, тыйым шарныше-влак верч Тудым кугун сӧрвале.

Кондак, 1-ше глас
Христос, Тыйын Божественный орлыкым чытыметын вийжым умылен, Господь, Тыйын у угодникет, пеш ушан Леонид, туныктышо да мученик таче лектын: тудо Тыйын тўням Утарыше Юмо улметым, Шке тунемшет-шамычлан примерым ончыктыметым, Ыресеш колымо марте эн ончыч йӧсланыметым пален, пытартыш жаплан Тыйын почешет кайыме корным ойырен, поро туныктымашым ончыктен. Сандене Тыланет мурена: Тый, Христос Юмо, мученик-влаклан пеҥгыдемдыш улат.

Мученик Иоанн Воинлан вор деч аралаш да шолыштмым пєртылташ лудмо молитва
О, Христос верч кугу орлыкым чытыше Иоанн! Чын ўшаныше-влак верч пеҥгыдын шогышо, тушман-влакым поктен колтышо, шыгыремдыме-влакым аралыше! Ойго да эҥгек деч утлышаш верч сӧрвалымынам колышт, вет тыланет ойганыше-влакым лыпландараш, кертдыме-влаклан полшаш, титакдымым арамеш колымаш деч утараш, чот орланыше-влак верч чыла осалым сеҥышаш верч кумалаш Юмо деч куат пуалтын. Мыланна шинчалан койшо але койдымо тушман ваштареш кучедалаш полшышо лий, тек тыйын полшыметлан, аралыметлан кєра мемнан ваштареш шогышо осаллан намыс лиеш. Святой Троицыште моктымо мемнан Господь Юмына деч сєрвален йод, тек языкан да йӧрдымӧ кул-влак Тудын деч каласен моштыдымо порылыкым налыт, кудым йӧратыше-влаклан ямдылен, кызытат, керек-кунамат, курым-курым мучкак. Аминь.

Ял озанлык пашаште кўлешан молитва-влак

Шурным ўдымӧ да погымо годым, поян лектыш верч Эн святой Юмын Аван

«Спорительница хлебов» иконыжо лўмеш молитва
О, Юмым Шочыктышо Эн Святой Ӱдыр, Эн Чаманыше Владычице, Пылпомышын да мландын Царицыже, христиан ешын да чыла суртын поро сӧрастарышыже, пашам ыштыше-влакын благословенийже, нужна-влакын пытыдыме поянлыкше, кўчызӧ ден тулык ватым да чыла еҥым Пукшышо! Мемнан Пукшышына, Тўням Пукшышым Шочыктышо да мемнан киндынам Шочыктышо да Шукемдыше, Тый, Владычице, Шке Ава благословениетым мемнан олалан, яллан, суртлан да кинде пасулан, да Тыланет ўшанышылан чылалан колтет. Садлан поро лўдмаш да ўҥышӧ шўмна дене Тыйым йодына: мыланна, Тыйын сулыкан да йӧрдымӧ кулет-влаклан, мемнан илышнам сайын вўдышӧ ушан Суртоза лий. Чыла калык тўшкам, чыла суртым да ешым шотаным ыште да православный да ик шонымашаным, мут колыштшым да уланым ыште. Кўчызым да нужнам пукшо, шоҥгылыклан Эҥертыш лий, изи-влакым ончен кушто, чылаштымат Господь Юмо дечын чон почын йодаш туныкто: «Мемнан илышаш киндым, тачылыкым, мыланна пу». Эн Яндар Ава, Шке еҥет-влакым тўрлӧ нужналык да чер деч, шужымаш да пуштедымаш деч, шолем да тул деч, тўрлӧ осал паша да ситыдымаш деч арален кодо. Мемнан илыме верлан (ял лўм), суртлан, ешлан да чыла христиан-влаклан да пўтынь эллан тынысым да кугу чаманымашым йодын нал, да Тыйым, Эн чаманыше Пукшышынам да Темышынам, чапландарена, кызытат, керек-кунамат, курым-курым мучкак. Аминь.

Шудо солаш кайыме годым

Преподобный Савватийлан, Соловецкий чудотворецлан, молитва
О, преподобный ача, Христослан йӧршӧ Савватий, уло чон дене Господь Юмым йӧратыше да тиде ир мландышке кайыше, да утарымаш подвигым ыштыше. О, Пылпомыш Кугыжан ўшан кулжо, поро пашалан туныктышо, ўҥышылыкын тўсшӧ, ир мландын гражданинже, Суксо дене мутланыше, каваште илыше, мланде ўмбалнысе херувим, кавасе айдеме. О, Соловецк островын пычкемышалтдыме волгыдыжо, чын верам кучышо-влакын Черкыштын кугу волгыдыжо. Мый, шуко сулыкан, тылат, пеш пагалымылан, кумалам: кол мыйын, шке кулетын, нужна кумалмем, тўткын колышт мыйын яндар огыл умшам дене ойлымем, кызыт тый дечет полышым йодшым. Вет пеш чот чояланыше тушман эре мыйым пытараш тӧча, мыйын чонем уло куат дене нелаш кычалеш, да мыланем утаралтыш уке, кушто полышым муаш, вет ўнардыме капем дене авыралтынам да ажгындарыше вий дене пўгыргенам, ом керт Юмо деке савырнен. Шкаланем аралтышым йодын, кызыт тыйым сӧрвалем: чамане мыйым, осал паша дене ойгаҥшым, мыйын нерген Господь Юмо деке шке яндар кидетым нӧлтал, о, шокшын кумалше, преподобный Савватий. Шке порылыкшын поянлыкше дене тек мыйын сулыкем кудалта да суд кечын мыйым курымашлык орландарымаш деч утара, да Шкенжын порылыкшо дене Шке Кугыжанышышкыже пурта, да Тудым эре моктен мурена, чапландарена да тудлан сукен кумалына курым-курым мучкак. Аминь.

Кукшо игече годым йўрым кондымо нерген

Молитва
Чылам кучен Ашныше Господь Юмына, Тый декет поро кумылан улмыжлан Фесвитян Илиям колыштынат да мландышке йўрым жапыште колташ чаренат, тыгак тудын молитваж дене саскам шочыктышо йўрым мландылан пуэнат. Чылам кучен Ашныше, Тыйын Шке порылыкет деч сӧрвален йодына, Тыйын йодшет-влаклан ласка йўрым пу; да мемнан сулыкнам ончыде, Шке йўретым кўлешан да йодмо верыш колто; Тыйын нужна еҥет да йоча-влак верч, вольык да чыла моло верч мландын тўсшым куандаре; кўлеш жапыште кочкышым пуэт манын, нуно Тыланет ўшанат. Господь,   Тый мемнан Юмына улат, эре чамане да утаре, да Тыланет чап мурым мурена, Ачалан, Эргылан да Святой Шўлышлан, кызытат, керек-кунамат, курым-курым мучкак. Аминь.

Святой Илия Пророклан

Тропарь
Чапым налше Илия, кап дене суксо, пророк-влакын негызышт, Христос толшаш деч ончыч кокымшо Предтече. Елисей пророклан черле-влакым паремдаш да проказа чераным эрыкташ кўшычын поро вийым колтен да тудым шотеш пыштыше-влаклан паремдымашым пуа.

Кондак, 2-шо глас
Мемнан Юмынан кугу пашаже-влакым ончылгоч ужшо да увертарыше пророк, кугун пагалыме Илия, шке каласыме шомакет дене вўд йоктарыше пыл-влакым чаренат, Айдемым йӧратышым, Иктым, мемнан верч сӧрвале.

Молитва
О, Юмын Святой пророкшо, Илия, айдемым йӧратыше Юмым мемнан верч сӧрвале, да тек мыланна, Юмын кулжо-влаклан (лўмышт) ӧкынымӧ шўлышым да сулыкна-влаклан касарымашым пуа, да Шке чыла сеҥыше порылыкшо дене чын огыл корно деч кораҥаш полша, тўрлӧ поро пашам шукташ да шкем кучен керташ мемнам пеҥгыдемда, да шўмышкына ўҥышемме да лыпландарыше шўлышым, шўмбел йӧратымаш да шыдешкыдыме шўлышым, чытымаш да яндарлык шўлышым, шке лишыл-влакын утаралтшашышт верч поро азапланымашым да Юмын чапше верч тыршыме шўлышым пурта. Шке кумалмет дене мемнан деч Юмын чын шыдешкымыжым кораҥде, да тиде курымышто порын да тыныслын илен, Господь да мемнан Утарыше Иисус Христосын Кугыжанышыштыже, Тудын курымаш порылыкыштыжо лийына, Тудлан, Мучашдыме Тудын Ачажлан да Пеш Святой Шўлышлан моктымаш да кумалмаш лийже курым-курымеш. Аминь.

Чодыраш кайыме деч ончыч

Соломон кугыжалан молитва
Тыланет, кайыме корным волгалтарыше святой Соломон кугыжа, шке пашат дене пылпомышыш кўзымӧ корным волгалтарышылан, мый, шуко сулыкан, ўҥышӧ шўмем дене сукен кумалам да кӧргӧ чонем дене йодам: Айдеме йӧратыше Юмым мыйын верчем сӧрвале, тек мыйым сулыкын корнывожыштыжо йомын кошташ ок кодо, да тек мыйын ушем да шўмем шуко порылыкан Шке волгыдыж дене волгалтара, да тудын дене волгалтын да пеҥгыдемын, мландўмбалне илышаш кечыштем чын корно дене шўртньыде каен кертам. Эн поро Господь деч тыйын йодмет дене чапланыше Кугыжан Пылпомышсо сылне полатыштыже эртыше чон куандарыше пайремыште шинчаш кеч изиш да йӧршӧ лиям. Да Тудлан, Тўҥалтышдыме Тудын Ачажлан да Эн святой, Поро да Илышым ыштыше Шўлышлан чап, пагалымаш да кумалмаш лийже курым-курым мучкак. Аминь.

Пакчаш шындыме годым

Апостол да евангелист Лукалан молитва
О, чот чапланыше апостол Лука, Христос верч шке чонетым пуышо да шке вўрет дене Тудын пасужым ўяҥдыше! Тыйын йочат-влакын молитваштым да орланыше шўмышт дене кондымо сӧрвалымыштым кол. Теве сулык да закондымо паша дене ойгаҥынна да тидлан верч пыл дене леведалтме семын азап дене авыралтынна, поро илышын елейжылан нужнаҥынна, да сут пирылан ваштарешыже шоген огына керт, нунышт Юмын поянлыкшым вожылдымын шолышташ тӧчат. О, виян! Мемнан кертдымылыкнам наҥгаяш полшо, шўлышет дене мемнан деч ит кораҥ, да Юмын йӧратымыже деч мучаш марте огына ойырло, но пеҥгыдын шогымет дене мемнам арале, да тыйын сӧрвалымет дене мемнам чыланнамат Господь Юмо серлага, мемнан шотлен пытарыдыме сулыкнам возымо кагазым тек пытара да чыла святой-влак дене пырля поро пиалан Кугыжанышыштыже Шкенжын Пачажын сўаныштыже лияш йӧршым ышта. Да Тудлан чап, моктымаш, таум ыштымаш да уло чон дене кумалмаш лийже курым-курым мучкак. Аминь.

Мланде ўмбалне поян саскам куштышаш верч

Священномученик Харалампийлан молитва
О, священный да шуко орланыше айдеме, Христосын мутланыше пачаже-влакын поро кўтўчыжӧ, Христосын священномученикше Харалампий, Магнисийын моктымыжо да тўнян чапше, тўня волгалтыш да мемнан кугу аралтышна да ойгышто, азапыште да чыла нужнаште поро полышкалышына! Мемнам, тый декет толшо да тыланет кумалше сулыкан-влакым, кол да мемнам тўрлӧ осал авырыме деч утаре. Тый вет шуко да неле орланымашет да чытымашет дене Господь деч чыла вере да чыла пашаште мыланна эре полшаш порылыкым да кугу вийым налынат, да кушто, чарныде кумалын, тыйым чапландарен мураш да эн чот пагален шарнаш тўҥалыт, тушто утларак полшо. Тыгай порылык пуалтын тылат, Христосын священномученикше, тыйын йодмет почеш тый декет толшо Чап Кугыжа деч: кунам тыйым керде дене руалаш судитленыт, тунам колынат тыланет ойлымо пеш вучымо да эн сылне йўкым: «Тол, Харалампий, Мыйын йолташем, Мыйын лўмем верч шуко орлыкым чытыше, да йод Мый дечем мо кўлешым, да Мый пуэм тыланет». Тыйже, кугу волгалтарыше, ойленат тунам Господь Христослан: «Мыйын Господь Юмем, мыланем Тый дечет, Пычкемышалтдыме Волгыдо деч, тыгай пєлек шуко лийын. Тыйын кумылет уло гын, йодам Тыйым, пӧлекле мыланем Тыйын тыгай серлагышетым: кушко пыштат мыйын капем да кушто мыйын орланымем нерген шарнымаш пагалыме лиеш, тудо верыште нигунам огеш лий ни шужымаш, ни орлык, ни саскам пытарыше шакше юж, но тек лиеш тиде верыште тыныс, кап-кыллан тазалык да чонлан утаралтмаш, айдемын кўлешлыкшылан кучылташ лыҥак шыдаҥ, йошкар арака, ўй да вольык шукеммаш». Кунам тый, Христослан йӧршӧ, шуко орланыше Харалампий, Господьын каласыме йўкшым колынат: «Тыйын йодмет семын лийже, чот чапланыше Мыйын сарзем». Да тунамак, Господьын каласыме почешак, керде дене руалме деч ончычак шке чонетым пуэнат, Христос Господьын корныж дене кугу чап дене каенат, да Суксо тыйым вашлийын да кугу куан дене Господьын Престолжо деке ужатен. Да тыге Господьын Эн святой лўмжым курым мучко чапландарыше святой-влакын чурийышт ончылно Христос Юмын кидше гыч чап венецым налынат. Юмылан йӧршӧ, тушто, Пылпомышсо чапландарыме верыште улмет годым, мемнамат, тыланет кумалше сулыкан-влакым, ончал да шарналте мемнам Господь ончылно, да пӧлеклыже мыланна Шкенжын чаманымашыжым курым-курымеш. Аминь.

Кўтўм, кўтўчым да вольыкым аралыме верч

Великомученик Георгий Победоносецлан молитва
Святой, чапланыше да чылаштын моктымо Георгий, Христосын великомученикше! Ме, тыйын храмыштет погынышо да тыйын иконет ончылно сукен кумалше-влак, тыйым, мемнан верч ўшанлын йодшым, сӧрвалена: йод мемнан дене пырля да мемнан верч сӧрвале поро Юмынам, тек чаманен колеш мемнам, Тудын порылыкшым йодшо-влакым, тек ӧрдыжеш огеш кодо мемнан утаралташ да нужна илышым саемдаш йодмынам да мемнан державылан ваштареш шогышо тушманым сеҥаш вийым пуа, да тыланет пуымо порылыкшо дене православный воинствым кредалмаште пеҥгыдемда, да мемнан ваштареш шогалше тушманын вийжым пытара, тек вожылыт да вурсалтыт, да нунын осалышт тек сўмырла, тек палат, кузе мыланна Юмо полша; ойгышко да илышыште нелылыкыш логалше чыла еҥлан шуко виян аралтышетым ончыкто. Господь Юмым, чыла чонаным Пўрышым, курымашлык орланымаш деч утараш сӧрвале, да эре чапландарена Ачам да Эргым, да Святой Шўлышым, да тыйын Юмо ончылно шогыметым ойлен палдарена, кызытат, керек-кунамат, курым-курым мучкак. Аминь.

Севастийысе епископ священномученик Власийлан

Тропарь
Койышет дене апостол да нунын пашаштым шуйышо лийынат. Юмын Шўлыш дене коштшо, Юмым ужмашке шуынат. Тидлан верчын, священномученик Власий, Юмын мутым шуктенат да ўшанымашетлан верчын вўр марте орланенат. Мемнан чоннам утарышаш верчын Христос Юмым сӧрвале.

Кондак
Юмо деч иланыше да чарныде пеледалтше Христос пушеҥгын шуко орланыше укшыжо, чоныштет Юмым нумалше Власий, ўшан дене тыйым шарныше-влакым шкендын куанет дене теме да мемнан верч чарныдеак кумал.

Вольык пытыме деч

Иерусалимысе архиепископ святитель Модестлан

Тропарь
Юмо дечын кугу ушым налше Модест, пеш чын илен, святитель вургем дене сылнештаралтынат, Иерусалим олан пеш поро кўтўчыжӧ, куан кумыл дене Христос ончылно шогет да тўня тўр марте сылнын волгалтарет, садлан тыйым сӧрвалыше-влаклан полышкалыше да чылашт верч кумалше лий.

Кондак
Чапланыше иерарх да чудым ыштыше Модест, тыйын волгыдо подвигетын пеҥгыдылыкшым да чылашт деке чаманымашетын поянлыкшым ужын, чыла Поро подвигым пуышо Юмо тыланет Шкенжын кугу пӧлекшым пуэн. Сандене тыланет кумалше-влак сӧрвален йодына: шучко илыш деч мемнам утаре да неле чер деч мемнам паремде.

Стихира
Толза, ўшанле-влак, псаломышто возымо семын куанен, Святой олан чапше, серлагышын пытыдыме памашыже, ойгышто улшо-влакым шыматыше, сулыкан-влак верч вожылде йодшо, мемнан утаралтшаш верч кумалше иерарх Модестым моктен мурена.

Кугу тўкан вольыкым аралышаш верч Орланыше Агафиялан молитва
О, шуко орланыше да кугу ушан великомученица Агафия! Тый чонет дене Пылпомышто Господь Юмын Престолжо ончылно шогет, тылат пуымо порылык дене мланде ўмбалне тўрлӧ чер деч паремдет; тыйын эн яндар тўсет ончылно шогышо да кумалше, да тыйын полышетым йодшо-влакым чаманен ончал; мемнан нерген Господь Юмо деке шке святой молитват-влакым шукто да мемнан сулыкна-влакым касараш, черле-влаклан паремаш, ойган да эҥгекыште улшо-влаклан вашке полышым йод; мыланна чылалан шке илышнам христианин семын мучашлаш да Шке страшный судыштыжо поро вашмутым пуаш Господь Юмым сӧрвале, да тый денет пырля чапландараш йӧршӧ лийына Ачам, Эргым да Святой Шўлышым курым-курым мучкак. Аминь.

Мўкшым ончымо годым Господь Юмын Предтечыже да Тынеш пуртышыжо Иоаннлан

Молитва
Христосын Тынеш пуртышыжо да кугун пагалыме Предтечыже, пытартыш пророкшо да порылыкышто икымше орланышыже, пўтым кучышо да ир мландыште илыше-влакын да яндарлыкын туныктышыжо, Христосын лишыл йолташыже! Тыйым сӧрвален йодам, тый декет толам, шке аралтышет деч мыйым ит кораҥде, но мыйым, шуко сулык ыштымемлан верч ўлык камвочшым, нӧлтал; сулыкым касарыме дене, кокымшо гана тынеш пурымо семын, мыйын чонемым уэмде; сулык дене амыргымем деч мыйым эрыкте, да Пылпомыш Кугыжанышыш, кушко нимолан йӧрдымылан пураш ок лий, каяш тарвате. Аминь.

Мўкш отарым благословитлыме молитва
Чылам пўрышӧ Юмо, нӧшмым благословитлыше да шукемдыше, да тудым мыланна кочкаш йӧршым ыштыше; о, мемнан Иисус Христос Господьна, Предтече да Тынеш пуртышо Иоаннын йодмыж почеш мемнан сӧрвалымынам чаманен колышт, шкендын поро кумылет дене нине мўкшым порын благословитле да святитле, да тек нуно тыйын лўмешет шке поян саскаштым Тыйын храметым да Тыйын святой алтаретым сылнештараш да сӧрастараш кондат, тыгак мыланна кучылташ йӧршым пуат. Тудлан чап да моктымаш курым-курым мучкак. Аминь.

Чоҥымо паша годым Белгородысо епископ святитель Иоасафлан молитва
О, чудым ыштыше Белоградский Иоасаф, Христосын святительже! Кузе Господьын шинчаже чын ыштыше-влакым онча да тудын пылышыже нунын молитваштым колеш, туге меат, сулыкан да нимолан йӧрдымӧ-влак, ўшанена да тыйын молитват ден аралтышетым йодына, апостол-влакын ойлымыштлан ўшанена: тыйын йӧратымашет мемнан деч нигунам ок кораҥ. Шке сулыкна да черна верч эҥын кийыше йытын да тодылалтше омыж гае веле улына гынат, Юмын чаманымыже да Тудын праведникше-влакын молитвашт дене эше илена. Праведник ача, тыят шке шўметым мемнан кумалмына деке савыре да тыйын Юмо ончылно шогымет дене христиан тукымлан Господь деч тынысым да благословенийым пу. Православийым пеҥгыдемде, Юмын Черке ўмбаке осал да закондымо-влакын кержалтмыштым кораҥде. Тушманын кержалтмыж деч, калык-влак коклаште ваштарешла шогымаш да пудыранымаш деч, пытарыше мардеж, тул да колымашым кондышо чер деч, шужымаш, вўд ташлымаш да моло эҥгек деч утараш мемнан Пылпомышсо Ачанам сӧрвале. Христос Юмына деч мемнан чонлан пеҥгыдылыкым, каплан — тазалыкым, черлылан — паремдымашым, окшаклан — коштын кертмашым, сокырлан — шинча почылтмашым, йыжыҥдымылан — пеҥгыдылыкым, шўлыканлан — чыла ойго деч кораҥмашым да лыпланымашым йод. Христосын кушкылжо дечын ойырлышо укшым тый угыч ушо, кузе шкеат Тудын пелен лийынат. Да тек тый денет эн Чын да эн Сылне мемнан Юмынан: Ачан, Эргын да Святой Шўлышын лўмжӧ кызытат, керек-кунамат, курым-курым мучкак чаплана. Аминь.

Ужалыме-налме паша Сочавский великомученик Иоанн Новыйлан

Тропарь
Орланыше Иоанн, мланде ўмбалнысе илышым порын виктарен, чаманымашет, чўчкыдын кумалмет да шинчавўдет дене, орланымаш деке пӧръеҥ семын лўдде кайымет дене перс-влакын ондалымыштым тўжваке луктынат. Тидын дене Черкым пеҥгыдемденат да христиан-влакын моктымо еҥышт да эреак шарныме У Иоанн лийынат.

Арака йўмӧ язык деч утлаш полшышо молитва-влак Юмын Аван «Неупиваемая Чаша» иконыжо лўмеш

Тропарь, 4-ше глас
Таче ме, ўшаныше-влак, Юмын Эн Святой Аважын пеш сылне да Божественный образше деке, Шке чаманымашыжын Йўын Пытарыдыме Пылпомышсо Чашыже дене ўшаныше-влакын шўмыштым йўктышӧ да нунылан чудо-влакым ончыктышо деке, толына. Тыгай чудым ужын да колын, ме уло чон дене куанена да шокшын сӧрвалена: пеш чаманыше Владычице, мемнан чернам паремде да языкым йӧратымашна деч кораҥде, Шке Эргычым, мемнан Христос Юмынам, мемнан чоннам утараш сӧрвале.

Кондак
Ойырымо да чудо семын утаралтмаш мыланна пуалтын — Тыйын пагалыме образет, Владычице, Юмым Шочыктышо, тудын полшымо дене чонын да капын йӧсыж да ойгыж деч утаралтына, Тыланет таум ыштыме моктымашым кондена, Эн Чаманыше Ӱшыкна. Тый, Владычице, «Неупиваемая Чаша» манын лўмдымє, мемнан кумалмынам да сӧрвалымынам порын нал да йўмаш чер дене черле-влаклан утарымашым пу, да Тыйым ўшанен моктена: Куане Владычице, «Неупиваемая Чаша», мемнан духовный йўмӧ шумашнан шержым темыше.

Молитва
О, пеш чаманыше Владычице! Тыйын левед аралымашетым кызыт йодына, мемнан кумалмынам ит шўкал, но мемнам чаманен кол; вате, йоча, ава-влакым да йўмаш дене нелын орланыше-влакым, тиде черлан кєра шке авашт  — Христосын Черкыже деч да утаралтмаш деч кораҥше мемнан иза-шольына да ака-шўжарна, родына-влакым паремде.

О, Юмын чаманыше Аваже, нунын чоныштым тарвате да сулыкан камвочмаш деч вашке нӧлтал, шкеныштым утарыше кучен кертмашке нуным кондо.

Шке Эргычым, мемнан Христос Юмынам сӧрвале, да мемнан сулыкнам мыланна проститлыже да Шке чаманымыжым Шке еҥже-влак деч ынже кораҥде, а мемнан ушнам айыкым ыштыже да яндарын кучаш полшыжо.

Юмым Шочыктышо Эн Святой Ава, шке йочашт верч шинчавўдым йоктарыше ава-влакын, шке марийышт верч шортшо ватыштын, тулык да нужна, да йўшӧ ача-аван коден кайыме йоча-влакын, да мемнан чыланнан, Тыйын иконет ончылно сукен кумалше-влакын, йодмынам нал. Да тиде мемнан сӧрвалымына Тыйын кумалмет дене Эн Кўшнысын престолжо марте шуэш.

Левед мемнам осал деч да тушманын осал шонымашыж деч арале, да мемнан колымо годсо лўдыкшӧ шагатын южысо мытарствыжым тўкныдеак эрташ полшо, шке молитват дене мемнам курымаш суд деч утаре, да Юмын чаманымашыже мемнам пытыдыме курымла мучко леведеш. Аминь.

Порым ыштыше святой Вонифатийлан
О, кугу святой Вонифатий, поро Юмын поро кулжо! Аракам йўын орланыше да тый декет полышым йодын толшо-влакым колышт, кузе мландўмбалне илымет годым тый дечет полышым йодшо-влакым нигунам шўкалын отыл, тугак кызытат нине пиалдыме-влакым (лўмышт) утаре.

Юмо деч ушым налше ача, икана тыйын виноград пасуэтым шолем кырен каен, тый тунам, Юмылан таум ыштен, аралалт кодшо виноградым погенат, вўдшым темден лукташ да кўчызӧ-влакым ўжаш кўштенат. Вара, у аракам налын, епископийысе чыла атым поген, чўчалтыш дене темкаленат, да Юмо, поро еҥын кумалмыжым шуктышо, нигунам уждымо ӧрмашым ыштен: виноград вўдым темден лукмо верыште арака шукемын, да кўчызє-влак шке атыштым темкаленыт.

О, Юмын святительже! Тыйын кумалмет почеш черкын кўлешыжлан да йорло ден кўчызӧ-влакын пайдаштлан арака кузе шукемын, туге тый, поро кумылан, кушто арака ынде осалым ышта, тушто шагалемде, намысыштым йомдарен, аракам йўшӧ-влакым (лўмышт) иян алгаштарымыж деч утаре, неле черыштым эмле, начаррак-влакшым пеҥгыдемде, нунылан, вийдыме-влаклан, тиде алгаштарымаш деч утлашышт пеҥгыдылыкым да вийым пу, айык да таза илыш корныш пӧртылтӧ, поро пашам ышташ да айык илыш дене илаш кумылаҥде. Юмым йӧратыше Вонифатий, нунылан полшо, аракам йўмӧ шумаш логарыштым йўлалтараш тўҥалеш гын, осал кумылыштым пытаре, умшаштым Пылпомыш юалге дене юалтаре, Юмын Кугыжаныш деч кораҥдыше да чонлан эҥгекым кондышо койыш-шоктыш деч утлаш манын, нунын шинчаштым поч, йолыштым ўшанымаш кў ўмбалан пеҥгыдын шогалте, тек нуно, поро пашаште пеҥгыдемын, ўмырыштым мучаш марте намыс деч посна тыматлын шуктат да мучашдыме Кугыжанышын курымашлык волгыдыштыжо мемнан Иисус Христоснам, тудын Ачажым да Эн Святой, Илышым пуышо Шўлышыжым курым-курымеш чапландарат. Аминь.

Святой Моисей Муринлан
О, ӧкынен кумалмашын кугу вийже! О, чаманыше Юмын висен кертдыме келгытше! Тый, преподобный Моисей, ончыч толен коштшо лийынат, но вара, шке языкет деч лўдын, ойгыраш тўҥалынат да, ӧкынен, монастырьыш толынат да тушто, шучко пашатлан кӧра шортын, пўтым кучен, молитвам лудын ўмыретым эртаренат да лым лийде тыршымет дене языкетым кудалтыме куаным, чудым ыштен кертме вийым да Святой Шўлышын порылыкшым налынат.

О, преподобный, тый, шучко язык деч утлен, Юмылан йӧршӧ поро пашам ыштымашке шуынат, тыланет кумалше еҥ-влакланат (лўмышт) полшо: нуно, колыдымо чоныштлан да капыштлан, Святой Шўлышын храмжылан, мучашдыме эҥгекым ыштат, аракам шотдымын йўыт, колымашке лишемыт. Ӱмбакышт поро ончалтышетым савыре да нуным ужмышудымашын ит ончо, тый дечет полышым йодшо-влакым умылен колышт.

Преподобный Моисей, сӧрвале Владыко Христосым: Тудо, поро чонан, нуным ынже шўкал, да нунын колымыштлан ия ынже куане, но Господь нине вийдыме да пиалдыме-влакым (лўмышт) чаманыже, вет ме чыланат Юмын шочшыжо улына да Тудын Эргыжын Эн Яндар вўржє дене тўлен налме улына.

Преподобный Моисей, колышт нунын да мемнан кумалме мутнам, нунын деч иям поктен колто, йӧрдымӧ койышым сеҥашышт вийым пӧлекле, осалын куллыкшо дечын утаре, алгаштарыше вий деч да аракам шотдымын йўмӧ деч кораҥде, тек нуно, уэмше, айык чонышт да яндар ушышт дене арака йўде чытат, тек шотан илышым йӧратат, шкеныштым порын кучат да Чыла порым ыштыше да шочшыжо-влакым эреак утарыше Юмым ўмырышт мучко чапландарат. Аминь.

Святой кугече час-влак

Волгыдо Кугече арняште эр да кас молитва-влак олмеш лудалтеш
Мемнан святой ачанан кумалмышт верч, Господь Иисус Христос, мемнан Юмына, мемнам серлаге. Аминь.

Тропарь, 5-ше глас
Христос колымаш гыч ылыж кынелын, колымыж дене колымашым сеҥен да шўгарыште улшо-влаклан илышым пуэн (3 гана).

Христосын Ылыж Кынелмыжым ужын, Иктылан, Языкдыме Святой Господь Иисуслан, кумалына. Христос Юмо, Тыйын Ыресетлан кумалына, Тыйын святой Ылыж Кынелметым моктен мурена: Тый мемнан Юмына улат, Тый дечет посна молым огына шинче. Тыйын лўмет дене лўмдалтын улына. Инаныше-шамыч, чылан толза, Христосын святой Ылыж Кынелмыжлан кумалына: теве ынде Ыресше дене чыла калыклан йывыртымаш толын; керек-кунамат Юмым моктен, Христосын Ылыж Кынелмыжым мурена: пудалымым чытен колымыж дене колымашын куатшым пытарен (3 гана).

Эр ўжара деч ончыч Мария дене толшо да шўгар деч кораҥдыме кўм мушо-влак Суксо деч колыныт: Курымеш Волгыдышто Илышым, айдемылан шотлен, молан колышо-влак коклаште кычалыда? Ончыза шўгарысе леведышым, кайыза да увертарыза тўнялан, кузе Господь колымашым сеҥен кынелын. Тудо айдеме тукымым утарыше Юмын Эрге улеш.

Христос Юмо, шўгарышке воленат гынат, Колыдымо улмет дене тамыкын вийжым сеҥыше лийынат, ылыж кынелынат. Йывыртыза манын, миром кондышо ўдырамаш-шамычлан каласенат. Шке апостолет-шамычлан тынысым пєлекленат, языкеш йомшо-влаклан ылыж кынелшашлыкым пуэнат.

Шўгарыште капан, а тамыкыште   чонан, вет Тудо Юмо, райыште разбойник дене, а престолышто Ача да Святой Шўлыш дене пырля лийше Христос, чыла ситарыше да каласен мошташ лийдыме.

Тау Ачалан, Эргылан, Святой Шўлышлан.

Илышым кондышо, рай дечат сылне, чынжымак кугыжан полат дечат волгыдын волгалтын, Христос, Тыйын шўгарет мемнан ылыж кынелшашын тўҥалтышыже.

Кызытат, керек-кунамат, курым-курым мучкак. Аминь.

Святитлыме Юмын Кўшыл илемже, куане, Юмын Шочмо Ава. Тыйын гоч куан пуалтеш, сандене манына: чыла ўдырамаш дечат утла Тый поро Пўрымашан улат, Эн Сулыкдымо Владычице.

Юмо, серлаге (40 гана).

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Херувим-шамыч дечат утла пагалышашлык лийынат, Серафим-шамыч дечат таҥастарыдыме чапле лийынат. Тыйым, чынак, Эрге Юмым языкдеак шочыктышо Авам, кугу улат манын моктена.

Христос колымаш гыч ылыж кынелын, колымыж дене колымашым сеҥен да шўгарыште улшо-влаклан илышым пуэн (3 гана).

Тау Ачалан, Эргылан, Святой Шўлышлан, кызытат, керек-кунамат, курым-курым мучкак. Аминь.

Юмо, серлаге (3 гана). Поро сугыньым пу.

Господь Иисус Христос, Юмын Эрге, Эн Яндар Тыйын Аватын, преподобный да Юмым шке кӧргыштышт нумалше мемнан ачанан да чыла святой-влакын кумалмышт дене мемнам серлаге. Аминь.

Иисус Христос языкан еҥым  Шкеж деке ўжеш.

Эй, айдеме, молан тый Мый дечем ойырлышыч?

Мый дечем, тыйым йӧратыше деч, молан савырнен кайышыч?

Молан мыйын тушманем дене ушнышыч?

Мыйын тыйын верчынет Пылпомыш гыч волымем ушышкет нал.

Тыйын верчынет капланалтын айдеме лиймем ушышкет нал.

Тыйын верчынет Ӱдыр дечын шочмем ушышкет нал.

Тыйын верчынет изиеш лиймем ушышкет нал.

Тыйын верчынет укелан лиймем ушышкет нал.

Тыйын верчынет мланде ўмбалне илымем ушышкет нал.

Тыйым жаплымым ыштышаш верчын Мый жаплыдыме лийым.

Тыйым паремдышаш верчын Мый сусыргышым.

Тыйым ылыжтарышаш верчын Мый колышым.

Тый языкан лийыч, Мый языкетым Шке ўмбакем нальым.

Тый титакыш пурышыч, Мый титакетым Шке ўмбакем нальым.

Тый парымыш пурышыч, Мый парыметым тўлышым.

Тый колышашлык лийыч, Мый тыйын верчынет колышым.

Тидым тыланет Мый тыйым йӧратымемлан верчын веле ыштышым.

Тыйын тыге орланыметым ужын, чытен шым керт.

Тыге йӧратымем тый нимоэшат от уж мо?

Мый тыйым йӧратем, тый Мыйым от йӧрате.

Мыйым от йӧрате, языкым йӧратет.

Тыйын верчынет орлыкым ужмем ушышкет нал.

Тыйын верчынет сусыргымем, шўргӧ гыч кыралтмем, шўведалтмем ушышкет нал (Марк, 14,65).

Тыйын верчынет орлышо-шамыч деке ушалтмем ушышкет нал.

Тыйын верчынет осал колымаш дене колымем ушышкет нал.

Тыйын верчынет мландышке тоялтмем ушышкет нал.

Тыйым Пылпомышко кўзыктышаш верчын Мый Пылпомыш гыч волышым.

Тыйым нӧлтышаш верчын Мый изи лийын илышым.

Тыйым уланым ыштышаш верчын Мый укеан лийын илышым.

Вара мом келшыдымым Мыйын ўмбалнем муыч? Молан Мый декем толмет ок шу?

Порылыкым налнет гын, керек-могай порылыкат Мый денем уло.

Ласкалыкым ужнет гын, керек-могай ласкалыкат Мый денем уло.

Моторлыкым кычалат гын, Мый дечем весе мо мотор?

Чаплым кычалат гын, Юмо Эрге деч весе мо чапле?

Кўшнысым кычалат гын, Пылпомышсо Кугыжа деч мо кўшнӧ?

Поянлыкым кычалат гын, керек-могай погат Мый денем уло.

Уш-акылым кычалат гын, Мый Шке Юмын уш-акылже улам.

Таҥым кычалат гын, Мый дечем сай таҥ кӧ уло? Мый чыла верчынат чонем пуышым.

Мый дечем чот йӧратышым кӧм муат?

Полышым кычалат гын, Мый дечем весе тыланет кӧ полша?

Паремдышым кычалат гын, Мый дечем весе тыйым кӧ паремда?

Куанымашым кычалат гын, Мый дечем весе тыйым кӧ куандара?

Чонетлан тыныслыкым кычалат гын, чоным луштарыше Мый Шке улам.

Илышым кычалат гын, илышым пуышо Мый Шке улам.

Волгыдым кычалат гын, тўнялан волгыдо Мый Шке улам.

Чыным кычалат гын, Мый Шке чын улам.

Корным кычалат гын, Мый Шке корно улам.

Пылпомышко наҥгайышым кычалат гын, Мый ўшан вўдышӧ Шке улам.

Вара мо верчын, молан Мый декем толмет ок шу?

Ала Мый декем толаш от тошт?

Мый декем толмо весе деке толмо деч куштылго.

Ала тый Мый дечем йодаш лўдат? Инанен йодшым кӧм яра колтышым?

Ала тыйым языкет ок колто? Языкет гычын сулен налашак Мый колышым.

Ала тый языкем шуко манын лўдат? Мыйын поро кумылем языкет дечат шуко.

Эй, орлыкышто илыше-шамыч, нелым ужшо-шамыч, чыланат Мый декем толза, Мый тендам тынысландарем (Мтф. 11, 28).

¹ Кугече деч тўҥалын, Господь Иисус Христосын Кавашке Чаплын Нӧлталтме кечыж марте тиде молитва олмеш тыгай тропарь лудалтеш: "Христос колымаш гыч ылыж кынелын, колымыж дене колымашым сеҥен да шгарыште улшо-влаклан илышым пуэн" (3 гана).

² Кавашке Чаплын Нӧлталтме кече гыч Троице марте молитвам "Святой Юмо..." гыч тўҥалына. Ончычсыжым огына луд.

Кас молитва-влакат тыгай радам денак лудалтыт.

³ Тропарь – Юмым але Тудын святой-влакшым моктымо кўчык муро.

⁴ Кугече деч тўҥалын, Господь Иисус Христосын Кавашке Чаплын Нӧлталтме кечыж марте тиде молитва олмеш Кугече канонын 9-ше мурыжын припевше да ирмосшо лудалтеш:

"Суксо Поро пўрымашлан каласен: "Яндар дыр, йывырте! Адак каласем: йывырте! Тыйын Эргыч кум кече гыч колымаш гыч ылыж кынелын да колышо-влаклымат кынелтен; еҥ-влак, куаныза!

Волгалт, волгалт, у Иерусалим! Господьын чапше тыйын Ӱмбалнет волгалтын. Чот куане ынде да йывырте, Сион. Тыйже, Яндар, Юмым Шочыктышо, Тыйын Шочшетын кынелмыжлан куанен йывырте".

Кас молитва-влакат тыгай радам денак лудалтыт.

⁵ Преподобный – Юмын законжым пеҥгыдын кучаш тыршыше, тыглай паша деч кораҥше еҥ.